嚟到英國，我哋一家人最大娛樂係乜？ 當然唔係去行街, 飲茶食飯啦。都唔係睇戲，唱K啦。其實就係行超級市場。
其實一到埗，我哋就畀朋友帶咗去 High Street 行街街。初時以為佢會帶我哋去 Shopping 食嘢，點知……. 原來係去超級市場。中超、Sainsbury’s、M&S、Morrison，仲有幾間家品店。佢清楚晒邊間啲乜嘢抵買，邊間賣嘅肉類新鮮好食，邊啲貨品要等佢特價先好買。佢當然話要知慳識儉，唔好買貴嘢做水魚。介紹咗一輪之後，一條 High Street 居然會有咁多超級市場，我哋嗰日只係行咗幾間。第二日另一個朋友又帶我哋去 Tesco ，真係大到一個點。不過俗語有話，高處未算高，當我見識埋 Costco 之後就真係嘆為觀止，成個貨倉任你行，家庭電器，家庭用品，蔬果，肉類，酒，BB 用品，衣服，總有嘢你會啱。不過 Costco 英國入會有規限，要專業人士先可以申請。我哋嘅職業唔喺佢個 list 裡面，所以申請唔到做個人會員，只可以做 online member。顧名思義 online member 只可去網站購物，但網站啲價錢又貴過落 shop 買，點解咁㗎。。。 唯有諗下計點可以申請做到會員先得。
呢度嘅超級市場大部分都可以申請入會做會員，入會有乜著數？隨時有會員特價優惠囉。又或者購物儲分當現金駛。我哋差唔多間間超級市場都有申請做會員，全部都用同一賬號去買嘢，咁就唔會分散投資，可以集中儲分啦！呢度大部份嘅會員咭都可以掛落去 Google Pay 度，咁樣老婆自己出街都可以照用同一張會員咭，好鬼方便。估唔到嚟到英國，申請得最多嘅居然係會員咭。
雖然大部份嘢都可以喺超級市場買得到，有啲原本喺惠康百佳買到嘅嘢，你以為呢度都有，咁就大錯特錯了。例如我哋一家都喜歡飲嘅罐頭粟米湯，呢度唔係咁易買得到㗎。搵過其他牌子，都只係得磨菇雞湯，Tomato Soup…… 家樂B 薯片只有少部份超市有售，我最愛嘅 Pizza 味薯片當然無啦！呢度嘅超市真係有好多間，但係每間都總有各自特色。近排比較有興趣去得多嘅超市就係窮人恩物 – Lidl 。呢間超市啲價錢普遍平過其他，價錢平係咪會將貨就價？哈哈，我又唔覺得係喎。 佢哋所賣嘅肉類都好好味，同款1 Loaf 麪包又平過其他超市，總之就係平價得嚟有質素啦！屋企附近又咁啱有間 Lidl ，真係方便。
呢度嘅超市仲有一特色，例如 Sainsbury’s，Lidl，co-op 某啲分店如果你自助形式 check out 時，你 scan 完貨品個 code 後，要將件貨品放喺隔離個貨物格，其實呢個格用途就係磅重。例如你買咗洗衣液，你如果唔放去隔離個格，佢係唔會畀你 scan 第二樣嘢。而且佢會磅一磅你件貨物，究竟同你嘟嗰樣嘢係咪差唔多重量。如果唔一樣，螢幕就會出告示。Ok 符合重量嘅話就可以繼續 scan 第二樣嘢。記得，唔好諗住磅完就拎起放入購物袋，佢一見重量無咗，螢幕即時又再出告示，叫你放返低。佢嘅計算係會叠加上去，直到你嘟完晒所有嘢之後，畀埋錢就可以將啲嘢放入自備嘅購物袋。不過次次咁 scan 完先放入袋咪好鬼慢？阻鬼住晒後面排隊嘅人？原來，隔離啲人係會一早放定個購買袋喺個格度，scan 完一樣嘢就放入袋，咁就真係畀完錢就可以拎住個袋走人，快!!
另一樣嘢就係由於大家去親超級市場都會滿載而歸，所以大部份超級市場都會提供停車場，仲係免費泊車嘅添。不過大家要留意，每間超級市場提供免費泊車時間都有唔同，落車時記得望望究意呢間可以泊幾耐啦。如果唔係一過時，你收到嘅泊車費可能高達£80 – £90 ，收費都幾嚇人。
頭先講咗咁耐，都係講緊啲英國超市，有無華人超市？當然有啦。喺我住嘅附近 Croydon 就有一間好大好出名嘅榮業行。間 shop 又係勁大間，當然無 Costco 咁大啦。你隨便入去打個轉，睇下嘢，買下嘢，真係會用咗你一個鐘嘅時間。我喺呢度撞到好多香港人，而大家都會買香港制造嘅出前一丁，點心，同埋啲花雕，紹興酒之類嘅嘢。 因為英國超市無咁多呢啲調味料，香港人又出名為食，嚟到呢度又唔多出街食飯，個個都留喺屋企煮餸食飯，日練夜練之下，個個都變身成為廚藝大師。
仲有一樣嘢，其實大家都可以透過 TopCashBack 網站去購買 e-coupon / e-gift card，有回贈之餘，你哋仲可以用呢啲 coupon 買嘢，變相有折扣啦！好似 Morrison 為例，你買咗張 £30 嘅 e-coupon，如果今次買唔晒，餘額係可以留返下次再用，真係幾好㗎。
如果未登記做 TopCashBack 會員，可以透過以下 referral link 去登記註冊。咁你同我都會有回贈。你登記咗做會員之後，就可以叫親朋好友去用你條 referral link 登記，咁你同佢又再有回贈啦！
Referral Link: Joins TopCashBack
