Skip to content

砌傢俬

好好彩過嚟前已經搵咗屋,業主肯等半個月,等我哋過到嚟再簽約。間屋除咗基本電器已經包括之外,其他當然自己買返嚟啦。間屋原本就有洗衣機,雪櫃,電䁔爐,焗爐,抽油煙機……. 業主仲要係叫做新裝修過,大部份頭先講嘅嘢都係全新。地毯都重新鋪過,窗架都係全新,全屋都叫重新油過。今次真係遇到好業主,又租到間好好嘅屋。

本身住緊 airbnb時已經買咗個水煲。airbnb話晒有床有被,又有洗衣乾衣機。 但係新屋就係百無。 咁搬入去住,究意要有乜先最緊要呢? 之唔係就係被同床褥囉!住緊 airbnb時已經上網揀緊邊隻牌子比較硬身,最重要嘅係可以呢幾日送貨,如果唔係搬去新屋就要瞓地板。 心目中有 Sealy 絲漣同埋 Emma,兩隻都未瞓過。以前瞓嗰張係 Slumberland 斯林百蘭。呢個牌子之前香港個 Sales 話係英國牌子,但係我上網搵極都好似搵唔到,如果唔係我實搵返嗰張買 (莫非我被人搵笨?)。比較完一大輪,最後揀咗 Emma,因為做緊特價,加埋佢可以兩日內送貨,完全符合要求。不過真係估唔到而家啲床褥壓縮完得咁細, 好容易就可以搬上樓放好。

跟住就不停咁上 wayfair 網站睇傢俬,床架,茶几,sofa,衣櫃……. 成日覺得買呢啲嘢係咪應該要親手摸下,感受下啲質料先做決定。但偏偏老婆又想快啲決定,買齊傢俬就可以叫做完成咗件事,所以好快就揀啱個款落單。 有啲傢俬就去 IKEA 買,本身無諗過自己砌,好似香港 IKEA 咁,只係畀張單價嘅 10% 就可以有師傅砌埋,但點知呢度人工真係好貴,分分鐘係件傢俬嘅一半價錢。咁鬼貴,唔怪之得鬼佬都係自己一手一腳搞屋企嘢啦。 畀錢人搞真係要好有錢先得。 記住,IKEA 呢度送貨係要另外畀錢㗎,無話你買滿幾錢就可以免費送貨,呢度無呢支歌仔唱的。Wayfair 訂嘅傢俬又係要啲時間,不過無所謂,呢啲唔急。

呢度最大問題係唔會捨得畀錢請人砌傢俬,好多網上舖都一樣無提供安裝服務,所以就要自己動手去砌。好, 書枱先送嚟,咁就先砌書枱。 用支細細嘅工具螺絲批,扭下扭下,經過大半天努力,終於砌好兩張書枱畀蘇哈兩姊妹。 係咪好有成功感?梗係有啦,砌到兩隻手都甩晒皮,過關一定唔可以行自助通道,一定唔畀過。而且仲搞到我手指骨勁痛,完全唔想再砌落去。如果再用呢枝螺絲批砌,成對手可能會甩咗出嚟。漏夜唔瞓都上 Amazon 買支雞雞電批,2日後送到。 奉勸大家,如果過嚟的話,最好有支電批跟身,千祈唔好跟船跟啲家當過嚟。因為呢度全部傢俬都係自砌的。

收到支電批,即刻開工。 好快手就搞埋個衣櫃,書枱,書櫃,床架…… 真係有咗 “你”,世界都變得美。 話說有一日突然收貨,一個正正方方嘅盒,封面又無寫係乜。拆開嚟睇又一塊塊,一嚿嚿嘢。 摸落去軟綿綿,仲要係假皮,睇落咁似係 sofa 嘅? 打開說明書一睇,有無搞錯,點解連 Sofa 都要自己砌,乜唔係一張過送過嚟嘅咩? 新購買嘅傢俬,根本大部份都係要靠你雙手,咁你話,點可能無支電批喺身!

再提提大家,如果係上網訂傢俬,大家可以去 WayfairNextHomeOak FurniturelandDunelmArgos 網站睇下。

Mattress 網上店可以去呢兩間睇下,MyNextMattressMattressOnline 送貨速度都好快,價錢都叫平。

再提提大家,好多貨其實佢哋都要訂,所以睇啱就訂啦。我有幾件傢俬都要等成半個月至一個月先有。

睇啱嘅話,最好去 TopCashBack 網站搵呢幾間公司,睇下有無回䁬。 始終新屋入伙,要購買好多嘢,有得回贈做乜唔回,慳返啲錢去 high tea 都好吖。

如果大家未做會員,可以透過以下網址登記。咁你同我都有回贈。 之後你做咗會員就可以叫親朋好友去用你嘅referral link 申請做會員啦!齊齊拎回贈。

https://www.topcashback.co.uk/ref/skyers13

砌呢張碌架床,砌咗幾次,真係要落足眼力去睇說明書點砌
呢張床架就砌得比較輕鬆
真係估唔到連 Sofa 都要自己砌
宜家傢俬嘅嘢,真係適合自己砌,簡單
鞋櫃,床頭櫃

封面圖片來自 www.housebeautiful.com

Published in娛樂購物英倫生活

Be First to Comment

Leave a Reply

This site uses Akismet to reduce spam. Learn how your comment data is processed.