Skip to content

英國大大小小公園

香港嘅公園平時就去得多。平日去人少少,無咁嘈。但逢假日去就會見到大量姐姐們,香港人去野餐。無計,香港地方少,郊野公園一到假日就會好似街市咁迫爆。無論你想去野餐,去BBQ都好,一定要早起身去霸位,霸爐。都係嗰句啦!香港地方細嘛,人又咁多,難得假日,當然想同屋企人、朋友仔去郊遊啦!

嚟咗英國一個月,我都只係去咗屋企附近個公園行過下。呢個公園面積都好大,有條人工河道,又有個湖,當然仲有好多樹啦!而呢度真係人唔算多 (可能我住呢區人少),無論你幾時嚟都係咁上下。第一次嚟本身諗住睇下啲鵝,鴨,雀仔,欣賞下日落湖景。點知突然有隻松鼠走埋嚟身邊,仲同蘇哈兩小妹拎嘢食,好似完全唔怕人咁。然後再發現呢度原來有好多隻松鼠走嚟走去,好得意,蘇哈都追住佢哋嚟睇,好興奮。

去完第一次已經令蘇哈難忘,日日都話想拎啲 nuts 去餵下松鼠,麪包去餵下魚,雀仔。終於等到有日天氣好好,一大早叫佢哋起身,然後出發去餵松鼠。成朝去到蘇哈都不停餵雀,我就無無聊行嚟行去搵松鼠,原來咁早無乜松鼠,佢哋應該四五點先會出現。餵咗成個幾鐘 (究竟你哋帶咗幾多麵包嚟餵雀?) 我就話去下後面睇下係乜嚟,次次嚟到都只停喺呢度欣賞啲鴨,鵝,雀。。。

原來佢哋餵晒啲麪包所以先肯起行😫。行下行下,終於畀佢哋見到松鼠啦!有幾隻喺樹上走嚟走去,佢哋即刻拎咗啲 nuts 出嚟餵松鼠 (喂,其實你哋仲有無帶其他嘢嚟餵唔同動物?🤔)。其實佢哋係咪真係食得嘅呢?餵得咁上下,我又發現前面原來有個遊樂場,仲有好多遊樂設施,真係睇見大人細路都開心呀。拿拿聲叫佢哋嚟睇,諗住同佢哋去玩啦!點鬼知佢哋鐘意餵松鼠多過玩,又估唔到喎。

同一時間又畀我發現隔離場邊原來有個籃球場,yeah,下次可以自己帶個波嚟打。不過睇真啲,原來係籃球場加足球場先啱。佢籃球架底下面整咗個龍門架,咁就可以一場二用,讚。但係以我所見,踢足球嘅人已經霸咗兩邊場(果然係足球國家),場外張櫈見到有個好落寞嘅身影,一個拎住籃球嘅少年坐咗喺度望住個場,心裡面個滋味一定唔好受 (我明, 我真係明)。

繞咗個籃球場一圈,返到遊樂場已經見到蘇哈佢哋係度玩緊,當然都係因為無晒 nuts,所以咪可以走嚟玩囉。呢個遊樂場有大量鞦韆,有氹氹轉,有瀡滑梯。。。。最特別佢有一個飛越繩索畀你玩,啲細路個個排晒隊一個一個輪住玩,好有秩序禮貌。有啲大哥哥見到妹梅喺側邊等打鞦韆,仲會主動落嚟畀佢玩,唔會霸住玩好耐。不過可能始終都未咁識英文,妹梅都未可以同啲小朋友傾計,玩埋一齊。不過佢又好 enjoy 自己一個去玩。啲家長們都約埋兩三個家庭,一路嘆咖啡食早餐,吹水,一路睇住啲細路跑嚟跑去,都幾悠閒。

玩完一大輪,又係返屋企煮 lunch 嘅時候。其實假日咁樣,既充實,又可以放下小朋友電,真係幾好。自己大人行下,來回屋企都行咗成萬步,強身健體,不錯。

其實個公園仲有一大片草地畀人跑,上次喺 FB 見到話有人會搬個龍門架去呢啲草地,同小朋友玩踢波。 如果香港咁樣踩草地,唔知會罰幾多錢呢?

特別注意事項:其實公園有告示寫明唔可以餵麪包畀啲動物㗎,所以我哋嘅行為喺唔啱㗎。 你哋真係唔好學。不過我見好多本地人都係咁餵😝

呢個飛索,真係百玩不厭
一個公園可以有唔同種類嘅滑梯
Published in英倫生活行街街

Be First to Comment

Leave a Reply