大佬，剪頭髮有乜好講！咪就咁行入去同人講剪髮囉，有乜特別。
無錯，原來其實就係咁簡單。之前睇 FB，啲人話好驚去剪頭髮，因為外國人根本唔明你哋想點剪，佢哋都係用返自己外國呢套嘅剪髮方式，即係有啲類似 QB 嘅髮型一號、二號，剪完頭髮出嚟嘅人真係一式一樣。
其實自己一早都想去剪，但見到咁多 FB 負評，本身都有啲郩底。加埋平時出街又唔係話太唔方便，所以一直拖拖拖。對上一次剪髮已經係一月中嘅事，即係已經兩個多月無剪，平時都係一個月就去剪，保持清爽造型，而家咁鬼長真係幾煩。。突然的起心肝去剪髮，都係因為我心愛嘅籃球緣故。事緣 2 星期前打波時已經成日要撥頭髮，打打下又塌晒落嚟，好唔舒服。上星期再打時已經噴多咗定型噴霧，亦用多咗髮泥做固定，但係都係唔太得，搞到好樣衰。就係因為為咗打籃球可以專心啲，我第二日就去咗屋企附近間理髮店 Barbershop。
講樣我留意到嘅事畀大家知。呢度真係好多 Barbershop 㗎，真係總有一間喺左近。我住嘅呢度條街已經有 3、4 間，真係有咁多人日日都要剪髮嘅咩？我都睇過，平均價錢 £14 。我見過最平係 £13，最貴 £18，但大部份都係 £14。我呢間就貴少少，£15。點解我咁多間唔去，去呢間？除咗因為近之外，佢嘅裝潢，髮型師嘅樣貌，又著晒制服，室內又有專 for 兒童嘅髮型椅，加加埋埋一個整體形象都好舒服，所以就揀咗呢間！
第二朝瞓醒真係乜都無理就衝咗去剪。入到去間舖有成三個剪緊，又有一個等緊，當然乖乖坐低排隊等剪啦！十分鐘後好快就到我。理髮師問我想點剪，我就用啲簡單英文同佢講，再加上身體語言，指住側邊兩邊，make it short ，然後拿住一束頭頂頭髮又講，make it thin。當然最後講返句 Thank you 啦。跟住理髮師就話想幾短，我指住個側邊話大約咁上下啦！跟住佢話唔係講呢個，係啲頭髮由頭皮開始計算要留幾長，佢話 number 1 – 4 可以揀。真係唔識喎。然後佢係側邊逐個 number 試畀我睇，最後我揀咗 number 4。成個剪髮過程，理髮師都會間唔中同你講下咁樣 ok 唔 ok？亦會話呢度留長啲，你可以撥返去呢邊幫補下嗰邊 ( 你明我講乜㗎啦！😆) 最後就係畀我睇下後面剪成點。咁就剪完，畀錢走得。
不過理髮師臨尾都有問喺邊度嚟，我話 come from HK 。佢即時就講 China ？我話係 HK 。之後都講咗輪關於呢個題目嘅嘢，最後我話大部份嚟咗呢度嘅香港人都喜歡人叫我哋做 Hongkonger 。佢話佢會記住。然後佢又講少少自己嘢，佢都係唔鐘意自己本身個政府，所以先一家移民嚟咗英國，情況同我哋一樣。
總括成個過程都無乜特別話要用乜嘢字句，都係簡單英文講話想點剪就 ok。呢度比較特別，唔會好似香港咁叫你去洗頭，然後剪髮。一坐低就用一張紙圍住你條頸，然後圍條理髮圍巾就剪。全程都係噴少少水就搞掂，你唔會好似香港咁剪到成臉頭髮碎，又唔會成頸都係，最神奇嘅係，點解咁樣剪完，你撥頭髮都無碎嘅？ Oh….. My God!!!!
