Skip to content

Bad Luck Loves ME??

近排唔知行乜o野衰運, 頭頭碰著黑.  年頭睇過o的乜乜星座書, 生肖運程書, 都話屬兔o既人, 無論愛情, 事業, 健康都係唔錯o架嘛, 加埋睇埋豬年o既運程, 都話兔人係幾好, 大旺o架, 點解我會咁黑仔o既呢?  

黑o的乜o野?  唉, 講起上o黎就多囉…..  好似早前八月同十一月, 生眼瘡事件啦; 十二月打波又拗柴, 又腸胃炎, 又撞車啦; 唔知係咪黑起上o黎有條路, 估唔到一月份繼續黑…..

一月份買o左四樣電腦o野, USB 手指, USB Hub, HDD, External HDD Case, 估唔到居然一買返o黎, 全部都係壞o既….  激氣!!  另外最黑仔o野係……

話說 Victo 公司隻 HDD 壞o左, 佢話公司o的 data 好重要, 要搵專業公司係隻壞 HDD 度回復返o的 data, 咁我就拎o左去深水埗一間專業公司, 大約整o左一個星期, 我就拎住隻 External HDD 去間o野度抄返o的 data.  去到o既時候, 發覺佢o地可以回復返成 28GB o既 data, 好開心, 諗住成 28GB, 無理由企係度等咁戇居o架, 咪走去 M 記飲啖茶, 食個包先啦!!  半個鐘之後, 間o野打o黎話今日過唔到 data 比我, 叫我返去拎返個 hdd, 第二日再o黎過.  返到去之後, 我問個 staff, 點解今日拎唔到, 頭先明明抄緊 data o架, 佢即刻指住部電腦, 我都望o左一陣先發覺, 嘩~~~  點解唔見o左隻 HDD o架?  邊個富貴仔偷o左個 HDD? 

而家最擔心係驚o的資料外洩, 話晒係公司 data, 加埋重有o的私人相片 (唔好心邪, 唔係o的色情照), 擔心o的人亂咁 post 上網, 咁就弊傢伙啦!!  

希望黑氣快o的過去!  好運隨來!!  我唔想再係咁黑啦!!!!!!!!!  

1月22日後記:  今早一返到公司, 發覺個 keyboard 無啦啦 short o左, 又要破費買過隻新o既!!  黑~~~

Published in關於我的....

Be First to Comment

Leave a Reply