荃灣籃球比賽4

今場比賽地點又再返到和宜合道室內場, 比賽時間又安排係晚上十點, 打完都成十一點幾, 返到屋企真係攰死人.  今場比賽我o地得到一個前甲組球員(阿基)相助, 雖然技術, 衝勁已經大不如前, 但係佢有與生俱來o既本錢, 就係身高, 呢樣o野已經幫助球隊好多好多.  佢o既加入, 完全可以係防守方面改善球隊一路以來o既弱點, 俾到對手一份震懾力.  而對我o地球隊o既射手o黎講, 係一種定心丸, 我o地可以有足夠時間睇定先出手, 就算唔入, 都覺得佢可以搶到進攻籃板.

就係咁, 一開波, 我o地已經一路領先對手, 而由於阿基o既加入, 令到隊中o既射手 Sol 大顯身手, 全場共射入四個三分波.  根據對手過往o既比賽, 佢o地主要集中射三分球, 而今場我o地o既防守真係封殺晒佢o地o既強項, 搞到對手無啖好食.  我o地以由頭帶到落尾o既姿態而贏出比賽.  賽後, 我o地隊波o既惹火球員居然會主動走去同對方握手, 真係少見(惹火球員自己都話佢係第一次咁做), 可想言之, 加入阿基之後真係幫到佢, 令佢減輕好多後場工作.

我? 我o既表現?  哈, so far so good 啦!  由於上場比朋友話我唔夠霸氣, 所以今場有多少少改變, 我有一球係殺入對方禁區上籃; 亦由於應承o左團長, 今場比賽要取分多過上場, 所以今場我決心要取分.  一開場先o黎一個三分, 然後一個兩分, 總共五分, 嘩, 真係多過上場呀!!

突然間諗, 而家打o左四場, 每場都有一個三分進賬, 希望可以係整個比賽, 我每場都可以入一球三分!!  我會以呢個為目標進發, yeah~~

得分: 5
籃板: 2
封阻: 1

圖片取材自 basketballqld.com.au

Leave a Reply

This site uses Akismet to reduce spam. Learn how your comment data is processed.