Skip to content

Cheryl & Bobo 之喜

007 年 12 月 31 日早上, 天氣晴

晨咁早起身, 真係未試過咁早起身, 重要還著寒冷o既天氣, 真係好唔想起身呀…  不過無計啦, 鬼叫呢日係 Bobo o既大日子咩!  食過早餐, 我o地就出發接新娘子, 當然呢班姊妹唔會咁容易比我o地過關啦. 佢o地都算辛苦囉, 設計o左咁多o既遊戲比我o地, 可惜, 我o地兄弟同心, o的什麼遊戲, 我o地都好容易咁解決了, Bobo 當然好順利咁接到新娘子啦, yeah yeah yeah.

Bobo 結婚, 真係虛耗o左成班兄弟不少o既精力, 事關佢o地兩個結婚, 足足攪o左成年, 由籌備到完成, 當中真係發生好多事, 有開心, 有唔開心, 不過總算順順利利.  Bobo 係圍村人, 所以今次比較多o野搞, 好似前一晚要請村民食盆菜, 結婚當日o既中午, 又要請多次, 好多o野只有圍村人先會做, 好似放炮仗, 真係好耐都未感受過呢o的氣氛了, 好熱鬧.  由於 Bobo 係圍村人, 如果請飲一定要請好多人, 所以男女家唯有分開擺, 31 號就係男家, 6 號就係女家.  

今年唔知搞乜鬼, 好似剛過去o既一星期, 有成四日我都有份做兄弟, 真係怕會患有兄弟症候群.  好彩而家 Bobo 都結埋婚, 我諗我呢幾年都唔駛再做兄弟, 可以抖返吓. 男家同女家分開擺, 其實都無乜特別, 只係坐係接待處時唔駛問, 男家定女家?  亦唔需要分開男女家o既人情.  但係有一樣o野好搞笑, 就係男家擺酒o個日, 見到份人名表, 個個都姓鄧, 逢有人到o黎時, 就唔可以問貴姓, 因為個個都姓鄧, 係人名表度搵起人都寧舍特別困難.  

以前擺酒, 好多時都有一個環節, 就係新郎同新娘會比人玩, 但係近年o黎好似少o左呢o的環節, 取而代之係新人會表演一o的節目o黎娛賓, 今次 Bobo 就揀o左表演煮餸, 佢將o的食物砌出 I Love Cheryl  呢幾個英文字, 真係冧死人…..  唔知係咪受到 Bobo o既影響, 亞婷係女家擺酒日, 都話要表演, 當然都係表演佢拿手絕技啦, 彈琴, 外母同外父就唱歌,  讚!

Bobo 都成家立室嘛, 兄弟之中只有一個未結, 唔知佢又幾時會搵到真愛呢?  希望佢可以快o的搵到啦.  

想感受當日o既盛況, 可以到我o既回憶集睇睇!!

Bobo, 係度祝你 – 連生貴子, 白頭到老, 恩恩愛愛

圖片取材自 www.desicomments.com

Published in朋友

Be First to Comment

Leave a Reply