一月三日係亞 Rock o既結婚大日子. 佢同女友終於係 2008 年拉埋天窗, 真係可喜可賀. 當日佢o地係沙田馬場第一座看台二樓o既馬會廂房舉行結緍典禮. 當晚都開o左成二十七圍, 亞 Rock o的親朋戚友真係好俾面, 差唔多請親o既都有o黎, 即係証明呢個朋友o既人緣真係好好.
本來一早被邀約做佢o既兄弟, 但係突然間因為某o的緣故, 搞到我被迫要退出兄弟團, 係度真係要再同亞 Rock 講返聲: 唔好意思. 雖然我做唔到兄弟, 無去參與接新娘, 但當晚係電視播返佢o地早上接新娘o既情況時, 真係慶幸自己無去, 哈哈哈. 什麼騎喱食品, 騎喱動作, 騎喱姿勢, 總之每次做兄弟, 姊妹團梗有o的新o野o黎招呼班兄弟, 都唔明o的遊戲係邊樹搵返o黎o既.
以前成日同o的未拍拖o既朋友講, 想識女仔? 好簡單o者, 去教會啦, 梗搵到個o既! 嫌悶? 咁去做o的有意義o既o野囉, 做義工, 一樣好容易會搵到女友. 唔好問點解會容易, 總之係前人留落o黎o既, 一定準. 而亞 Rock 老婆就係一位義工, 而亞 Rock 亦係因為做義工而識到女朋友, 而家做埋老婆添…. 所以話真係善有善報o架!! 仲未拍拖o既朋友, 而家識得點做啦!!??
而家諗返, 我由中一開始就識亞 Rock, 唔知點解, 剛剛升中一, 一入學就坐o左係亞 Rock 隔離, 又唔知點解, 大家又咁o岩傾, 或者當時年紀小, 真係乜都傾得一餐. 可惜後來自己學業成績差, 咁之後都無一齊玩了. 出o黎做o野之後, 只係斷斷續續咁食下飯, 吹下水 , 但係大家都係好朋友, 一見面就好多o野講. 呢個兄弟朋友都計落識o左二十一年啦.. 一個唔短o既日子, 希望將來大家可以繼續落去.
朋友, 今次無做到兄弟, 他朝有日有乜事要幫手, 記得搵我, 一定唔會托手肘 (唔好誤會, 當然唔係指結婚做兄弟啦!!). 嘻嘻!! 朋友, 祝你
新婚愉快, 百年好合, 永結同心, 三年抱兩!!
圖片取材自 cn.depositphotos.com