撞車四個月之後, 終於到o左上庭o既日子 – 4月3日, 星期二, 早上九點半到達荃灣裁判處.
今日終於解決o左呢件煩惱事, 而家只係欠墊底費, 只要比埋保險呢筆數, 咁就叫做 close file.
今日一早九點十五分就到達o左荃灣, 入去第二法庭時, 見到o的公公婆婆, 全部坐晒係第一行, o個時覺得好奇怪, 搞乜鬼佢o地坐咁前呀? 我自己就當然坐係旁聽席啦! 因為都唔知可以坐係邊! 係開庭前一刻, 法庭人員係度讀名, 叫o的人跟住一個接一個去坐係第一行, 又估唔到班公公婆婆都係其中一份子, 佢o地原來唔係o黎聽審o架!
個感覺好得意, 好似以前小學生咁, 點名舉手排隊. 然後法官大人就入庭開始審理案件.
我算係排係最後o個十幾人, 所以都聽o左好多人犯乜事而要上庭. 而係呢個過程入面, 發生好多趣事.
之前提及o既公公婆婆原來全部係比人告阻街, 遺留物品係街, (大家唔好諗係亂拋垃圾呀, 其實係話佢o地係無牌小販呀), 點解會用遺留物品而唔用無牌小販, 真係唔知. 當中有一個人已經犯o左 33 次, 其他都有成十次以上, 唔怪之得, 佢o地咁醒目, 一o黎到就坐係最前排啦!
係審理期間, 法官會問, 你認唔認? 有無補充? 有無求情? 大多數人都會求下情. 例如有o的會話, 法官大人, 我係家中經濟之柱, 求你網開一面, 罰輕o的. 又有人會講, 法官大人, 我重未出糧, 可以唔可以遲o的先繳交罰款? 居然又可以得o架喎? 法律不外乎人情~~ 重有, 有o的人會講, 法官大人, 我知道錯o架啦, 我以後會小心o的, 自從發生呢次意外, 我都驚o左好耐, 每日駕車時都留心o左好多. (補充: 法官大人: 你驚? 之前你有二次不小心駕駛紀錄喎, 之前唔驚咩?) 哈, 比法官寸添!!
不過綜觀所得, 除非你係六七十歲o既公公婆婆, 如果唔係, 你求情之後, 通常o的罰款都會升o左! 大家都係撞車, 無求情o既係 800 – 1000, 有求情o既就係 1200 – 1500. 嘩, 真係唔求好過求. 所以到我o個時, 我話我認, 我無補充, 我無求情. 哈哈, 一千個大洋, 走得, 全程都不過三十秒.