Skip to content

長江 7 號、魔法奇緣

今日係年初五, 大家返工未呀?  新年放o左咁多日假, 又去o左邊呢?  有無去睇戲?  我就因為今年唔需要去拜年, 所以放假呢幾日都係屋企過.  ( 喂: 咁你咪好悶? ) 唔係喎, 我好滿足呀, 日日係屋企煲碟, 清o左唔少囤積o既 DVD, 真係一大樂事.  因為新年開幾大聲都無人會投訴, 可以盡情咁享受一下.

今年年初一就陪o左細妹同老婆去o左睇魔法奇緣.  講都唔信, 真係無諗過自己會去睇呢套迪士尼作品, 呢個故事係講童話故事入面o既公主, 比巫婆陷害而去o左現實世界, 當中有好多笑料出現, 我諗細路仔去睇會好開心, 因為真係好輕鬆, 亦係一個邪不能勝正o既故事.  套戲唔算差, 笑料好多, 故事概念都好好, 不過唔知係咪自己真係老啦, 對呢o的兒童片真係無乜特別喜愛, 不過如果你有細路仔, 真係可以同佢一齊去睇, 真係唔錯! 

年初三就約o左朋友去睇我o既最喜歡o既喜劇演員周星馳主演o既長江 7 號.  未睇前都已經收到好多風, 話唔好期望過高, 只係一般貨色, 所以我都抱住我係 fans o既心態去睇.  今次星爺係套戲度係要帶出親情, 友情, 最重要係表達窮人都有自己o既尊嚴, 有骨氣.  整個故事其實都無乜特別, 好普通, 如果比其他演員去做, 一定唔可能咁賣座 (截至二月九號, 收 $20,000,000).  就只因為係周星馳呢三個字, 而令到一部平平無奇o既戲變做不平凡.  

星爺, 已經愈來愈向幕後發展, 分分鐘呢部係最後一部.  由功夫開始, 星爺已經唔係擔正, 係長江 7 號更加可以睇得到, 佢已經做副手了.  星爺唔知係咪真係年紀真係大了, 佢依家開始想拍一o的有意思, 有內涵o既戲, 可惜, 佢唔係乜o野大導演, 隨手可以搵人拍得到佢o既電影, 呢部戲真係變得不再周星馳.  特技, 好多電影都可以請荷利活高手返o黎整. 好似魔法奇緣入面隻花栗鼠, 真o既一樣, 反而長江 7 號真係……  賣親情?  賣搞笑?  Sorry, 真係唔多覺.  係我心目中, 周星馳係搞笑能手, 點解唔去做返自己拿手好戲, 點解要去做一o的其他人都可以做到o既戲?  喜劇唔係個個都可以做, 真係睇到人開懷大笑, 唔係咁多人可以做得到.  自己艱苦咁建立o既形象就咁算數? 周星馳式o既演繹, 周星馳式o既動作, 周星馳式o既……   希望下一部戲可以睇得返晒!

Published in影音天地

Be First to Comment

Leave a Reply