人生有幾多次會親身體驗撞車o既經過呢? 你o地有無咁o既經驗呢? 當然我都希望你o地唔會有呢o的咁o既經驗. 講真, 咁多年o黎, 我都睇過唔少次撞車, 通常都係一o的輕微o既碰撞.
其實撞車有好多種, 一種係比人撞, 另一種係去撞人. 猶記得早年臨近聖誔自己都曾經發生過車禍, 自己唔小心撞o左去前面架車度, 好彩衝力唔係太大, 兩車只係凹o左, 人無事. 最後只係罰款兼扣五分, 呢次係後者, 去撞人.
而今日 (又係臨近聖誕) 就比我體驗到比人撞o既滋味. 話說係大陸工作返o黎, 拖住疲乏o既身驅去搭車, 上o左架單層 276 返元朗. 當架巴士駛到快速公路中段時, 係度睇緊雜誌o既我, 聽到好大聲o既剎車聲, 自然反應當然係往窗外看, 一看, 見到架本田 Jazz 係快線度左搖右擺, 跟住仲係快線度直衝向我架巴士, 我當時諗 – “嘩, 撞硬”, 諗緊o既同時, 見到架 jazz 居然係向我坐o既位置撞埋o黎, 當時諗到o既係 – “唔係呀嘛”…. 跟住諗 – “要避都避唔切啦”, 又再係諗緊o既時候, jazz 司機用力呔一轉, 成架車變成打橫咁撞向我o既住置, 當時又諗 – “嘩, 以卵擊石, 佢架車實死”, 即時扶實個把手, 然後望住架 jazz 撞落o黎, 再望住架 jazz 由慢線被撞回去快線, 然後停低.
其實司機發生呢o的事之後會點? 即時報警? 即時問有無人受傷? 錯晒, 個司機第一句話係, 唔關我事o架, 你o地做證人呀, 係佢撞埋o黎o架! 我聽到之後都忍唔住出聲, 報警先啦~~~ 而前面o既亞叔就問有無人受傷? 而我就跟住再望返架 jazz, 睇下個司機點? 佢郁唔郁到, 有無事? 好彩, 個司機可以爬返出o黎, 不過佢成個人呆晒, 仲企係馬路. 最後亞叔都忍唔住叫佢企返埋o黎路肩, 費事佢比o的失魂車撞到.
成個過程事後諗返, 點解我會睇得咁清楚, 咁仔細? 又可以有咁多時間諗咁多o野? 話晒條公路行 100 公里, jazz 個司機又年青, 好明顯係速度快, 唔小心撞到o的o野而失控, 成個過程其實發生得好快. 不過好彩o既係當時無車係後面撞埋o黎, 如果唔係架 jazz 真係…… 哎呀…. 唔敢想像!
希望體驗過呢兩次撞車之後, 唔會再有第三次o既發生. 唔係次次都咁好彩.. 求神保佑!!
Be First to Comment