Skip to content

北京奧運 2008

話咁快就到北京奧運o既日子, 8 月 8 日就係開幕禮, 唔知今次開幕禮會搞成點?  不過我諗一定會搞得好好睇, 早幾日有綵排, 見到放好多煙花, 又有好傳統o既中國儀式, 真係好期待.

今日聽到一則好震驚o既消息, 就係我公司有一個客, 佢o地由於要慶祝奧運o既關係, 8 月 8 日全公司放假一天!  嘩, 真係不得了, 呢個奧運仲勁過世界盃!!  世界盃都係自己請假去睇波, 但係呢個奧運居然會有公司自動放假比員工, 真係一讚, 無得頂.  呢間仲要係一間法國公司, 唔知大陸方面會唔會突然宣佈 8 月 8 日係全國休息日呢!!  我都為o左呢個北京奧運而買o左高清機頂盒. 

今年奧運我特別留意, 唔好以為係由於中國舉辦, 所以我會留意.  其實係因為我公司有同事可以參加奧運, 我為佢感到驕傲 (千祈唔好話我假, 我係真心o架).  呢個同事入o左我公司都有三年幾四年啦, 佢初入職時, 我都知佢係一個運動員, 大家應該都知, 香港無乜全職業選手, 好多運動員都係業餘性質, 而且佢玩o既項目都比較唔係咁熱門, 所以佢趁空檔期就走出o黎搵o野做, 賺下外快.  我好記得我o地問佢點解要搵工, 佢話比我o地知運動員都要食飯, 都想買一o的自己心頭好, 所以咪要出o黎打工囉.  如果只係靠政府o個o的車船津貼, 真係會唔夠用.  

佢大約做o左半年, 然後又要成日出外習訓, 比賽, 所以後來我o地將佢轉o左做 part-time 員工, 佢返o黎香港有時間咪返工囉, 做o既o野盡量都係一o的即日鮮, 唔會搞太耐.  其實我o地都真係好照顧香港運動員, 邊有公司會咁做o架…  佢反而似老闆, 得閒就返下工, 唔得閒就唔返, 真係寫意.

不過我o地近半年來真係好替佢擔心, 佢四年前參加雅典奧運, 第一戰就敗北, 佢為o左要爭取北京奧運門劵, 呢四年來真係好努力, 好用心咁去練習, 比賽, 終於比佢爭取到, 而且仲係以世界排名 18 o既資格拎入場劵, 我o地真係好替佢高興.  佢真係好有大志, 佢每一次都係想拎牌, 拎冠軍, 好有鬥心.  但係成功背後真係要有代價付出, 除o左無時間去玩, 日日不停咁練習之外, 換o黎o既重有傷患, 痛苦, 類固醇.  佢近年由於不停咁征戰, 累積o左唔少o既傷患, 久而久之, 呢o的傷患亦變成佢o既負擔, 好多時都要靠打類固醇o黎止痛, 大家知唔知打得多類固醇會點?  如果過量或長期咁使用, 會令到肌肉萎縮, 或者係骨枯, 好危險.  上次聽佢講, 今年係最後一年打奧運, 打埋今次, 唔會再打落去, 因為佢隻腳頂唔順, 再打類固醇o既話, 真係有可能會出事.  所以好希望佢今次奧運, 可以入三甲, 為自己, 為香港爭取首面奧運獎牌*.  

唔知無線亞視會唔會有奧運項目播放表, 咁等我可以一早預較錄影, 錄低晒我想睇o既項目.

大家今年又會留意乜o野項目呢?  我年年都係會留意一百米, 二百米, 男子籃球, 女排, 今年會多o左百一米欄, 希望劉翔再次為中國爭光啦. 

* 佩劍會係 8 月 9 日舉行, 亦會於同一日產生冠亞季獎牌.  

淇淇, 加油呀!!   打低譚雪拎冠軍返o黎!  我o地支持你o架!!!!

Published in公司

Be First to Comment

Leave a Reply