圓滿結束

2008 年 8 月 24 日係奧運o既閉幕禮, 正式代表北京奧運圓滿結束.  下屆倫敦奧運就要等到 2012 年, 大家先可以再次投入奧運熱潮.

今屆北京奧運真係辦得有聲有色, 絕對估唔到中國可以比到咁大o既驚喜比全世界.  由開幕禮一刻開始, 全世界都已經注視中國, 究竟中國可以將奧運辦成點?  經過北京奧委會o既努力, 各界人仕o既協助, 今屆奧運真係可以講話, Perfect.

今屆奧運, 大家都應該會成日諗返個開幕禮, 因為實在太精彩, 各項表演, 再加煙花, 令人目不暇給.  最令我興奮o既係電腦特技做出o黎o既 29 隻巨腳.  如果唔係翌日報紙講話係電腦特技, 你真係會當成係煙花, 好真.  除o左電腦特技厲害之外, 佢所表達o既意思亦係吸引人o既地方, 29 屆奧運, 就用 29 隻巨腳o黎踩入國家體育場 (鳥巢), 真係勁正……  當然, 體操王子李寧空中跑步繞場一周, 真係令人感動, 咁樣吊法, 仲要係空中作狀跑步, 難度極高.  而點聖火人選, 真係非李寧莫屬.  綜觀開幕禮, 真係給全世界一種舉世震驚o既感覺.  中國 WELL DONE~~~

當然, 開始之後總有終結之時, 24 號o既閉幕禮, 又再一次吸引全世界. 全世界又再談論中國今次又會有乜驚喜比大家?  佢o地會點樣熄聖火呢?  通常當大家抱有極大期望o既時候, 最後失望都會o黎到你身邊.  哈哈, 今次大家睇完熄聖火o個一刻, 都講o左一句, 嘩, 乜就係咁咋?  其實我都無乜預期過閉幕禮可以搞成點, 綜觀雖然比開幕禮係遜色o左, 但係不失氣氛.  大家可以係畫面中感受到奧運o既喜悅, 運動員o既喜悅, 從鏡頭中可以見到各國運動員都好 enjoy 呢一刻, 咁就証明閉幕禮係好成功.  閉幕禮帶出o左和平, 友愛, 歡樂等等o既訊息比大家. 咁仲可以要求乜o野呢?  中國又再一次  WELL DONE~~

不過, 係奧運期間, 我透過畫面, 報章得知一o的中國人民o既舉動, 係最令我不滿o既地方.  中國人當然支持中國選手, 但係亦唔好唔尊重其他國家o既選手.  當劉翔宣佈退出時, 即時見到o的中國人就咁離開座位, 走人, 好唔尊重其他國家o既選手.  當某國選手擊敗中國選手時, 又會發出噓聲; 又見過當某國選手出場比賽時, 觀眾會發出聲音影響選手.  其實呢o的行為係唔可以接受的.  雖然支持中國選手係好事, 但係咁樣破壞或者唔尊重其他選手, 就係一件唔好o既事, 亦可以證明中國人民o既素質係仲未成熟.  我睇乒乓球o既冠軍戰, 我係畫面見到瑞典o既觀眾好落力去同中國o既球員打氣, 佢o地無話因為冠軍戰o既選手係中國人而唔睇, 唔打氣.  我想中國人亦應該要做到呢一點.  尊重自己, 尊重別人, 體育精神嘛!

今屆賽事, 打破o左好多世界紀錄, 奧運紀錄.  唔知係咪因為場地關係呢?  定係科技o既關係?  訓練當然係最重要因素啦.  好似最令人印象深刻o既係牙買加o既短跑好手 – 保頓, 佢係一二百米都破紀錄, 真係嚇死人, 如果佢一百米無放軟手腳, 佢真係分分鐘可以做出九秒五o既成績.  想當年劉易斯o既九秒八六已經話係人類o既極限, 及後再出現九秒七二, 而家保頓跑九秒六九, 會唔會已經係極限呢? 定話四年後又會出現另一個極限呢?

另一個令我印象深刻o既係菲比斯, 佢打破o左前輩波波夫o既紀錄, 係同屆奧運入面連奪 8 面金牌, 真係勁~!  不過佢都贏得好險, 其中碟游只係以 0.01 秒贏對手, 如果唔係, 佢只可以得 7 面金牌, 不過都已經好勁啦.  將來又會唔會有人破到佢紀錄呢?  

如果想知?  就要睇實下屆奧運啦!!  選手們, 繼續努力~~~