Skip to content

Happy Father’s Day

剛剛過完母親節, 話咁快又o黎到父親節!  其實大家有無諗過, 點解會係母親節先o既呢?  父親節排後呢?  又話父親係一家之主, 乜唔係應該排先, 受人尊敬先咩?  定話因為母親懷胎十月, 含辛茹苦咁先生你出o黎, 好偉大呢~~~

無論點都好啦, 我都覺得父母係我心目中都係 “一枝棒”.  

今年正日就無同老豆慶祝, 我o地幾兄弟姊妹早一星期就同老豆出街食飯慶祝.  今年去o左元朗o既稻香食, 又估唔到o的o野食唔錯, 大家食完之後都話.  

諗下諗下, 其實我又真係無乜特別印象同老豆去過邊度玩, 可能老豆係廚師關係, 而且以前返工都係九龍區, 星期六日都無乜機會可以放假, 所以都無乜點同我o地四兄弟姊妹去過街, 通常都係亞媽同我o地去.  比較有印象o既係老豆同我去沙灘玩, 因為我細路哥o既時候, 只係去過沙灘兩次, 因為無人陪, 所以無乜機會去.  只有等老豆得閒先可以去, 所以好有印象, 亦因為咁, 到而家我仲未識得游水. 嘻嘻….

老豆比我o既感覺係比較隨和, 唔出聲, 管教o既o野都係交比亞媽, 所以我o地都係怕亞媽多過怕老豆, 當然啦, 老豆發火都好勁o架.  絕對唔係人咁品…  記憶最深刻係有一次, 當然都係做錯事啦, 居然比老豆一o野 “的” o左起身, 用布條縛起o左, 然後吊起身, 最後當然係滕條炆豬肉啦….  嘩, 諗起都覺得我老豆好凶狠….

不過點都好, 都多得佢, 先有我呢個衰仔… 哈哈!!  老豆, 多謝你!!

圖片取材自 vietnamtimes.org.vn

Published inHome Sweet Home

Be First to Comment

Leave a Reply