繼一月頭外婆過o左身之後, 昨晚返屋企食飯, 又聽到個唔開心o既消息, 就係抱病多時o既伯父都係早幾日離開了! 估唔到新年前外婆走o左, 而新年後伯父又走埋… 早幾日同o的客講開, 原來近排都好多人都離開o左, 個客本身都有親屬走o左, 仲有大家都知道o既開心果 – 肥姐都離開o左啦, 連影音界都失去o左 HD DVD 呢個高清選手!
一個一個不幸o既消息接踵而來, 伴隨住o既當然係唔開心啦. 但係另一方面諗, 佢o地都受o左病魔咁耐o既折磨, 離開都係一種解脫. 身邊人見到佢o地咁辛苦, 真係有苦自己知. 好似外婆瞓係醫院o個兩三個星期, 大舅父日日煲湯, 定時定候去醫院探佢, 我o地呢o的外孫就每個星期都搵一兩日去探佢, 見到佢時真係好心酸, 見佢坐唔安, 瞓唔落, 食o野又話無胃口, 精神一日一日差, 講o野又無氣無力. 有次佢仲話醫院o的醫生護士想毒死佢, 唔肯食藥; 又話叫醫生比佢安樂死, 因為佢好辛苦, 唔想咁…. 有次自己都忍唔住, 流o左眼淚….
雖然近幾年都無同伯父一家人見過面, 除o左係我前年結婚時, 伯父同伯母都有俾面o黎出席, 但係之後都無見過. 記得以前細過, 成日去伯父間酒樓食o野飲茶. 伯父好好人, 成日都請我o地食o野. 不過自從酒樓結束o左之後, 我o地都無乜點見面, 就只有新年時會去拜訪一下.
經過o左呢兩件事, 我諗返, 真係要得閒搵o左朋友, 舊朋友出o黎食下飯, 因為人生真係好短, 好化學, 今日唔知聽日事. 以前都會覺得, 朋友唔駛多見面, 大家心照咪得囉, 但係原來見面係另有其他原因.
點都好, 大家都要珍惜身邊人, 無論係親人, 愛人, 朋友, 都要好好珍惜!
圖片取材自 thebetteraging.businesstoday.com.tw
Be First to Comment