Skip to content

最怕…. 最討厭…

最怕….  最討厭… 

大家一睇標題, 應該就知道我想講乜啦!  唔知大家覺得最怕, 最討厭o既事情係乜呢?  

一直以o黎都以為自己係屬於o個隻乜都無所謂, 求求其其, 是是但但o既人, 但係原來有時自己都會……

而其中我最討厭o既事情就係 – 等位.  即係食飯要等位o個隻, 唔知點解, 我覺得我比錢出o黎食飯, 你仲要我等成幾粒鐘先食得你一頭半個鐘, 我最鬼憎.  有時仲要係我先到, 但係遲o黎o既人可以先入去; book o左位, 準時到達, 以為可以唔駛等, 點知又係要等, 咁我又做乜事要 book 位呢?  乜唔係一早預留張檯比我o既咩?  比錢食o野, 好似仲要受氣咁…..  

當然啦, 我o既最討厭o既o野都有好多種, 好似我最討厭比人屈啦; 我最討厭o的人隨街食煙啦…….

細細個, 記得以前讀幼稚園o既時候, 唔記得乜o野事了, 無啦啦比o的同學仔問(當然係靚女同學啦), 你o地邊個夠膽食粉筆, 當時o既一個鄉下仔, 即係我, 二話不說, 就拎起支粉筆, “啪” 一聲, 我食o左三分一支吞o左落肚.  嘩, 全場幾咁矚目呀….  重有, 當時o既幼稚園咪好興困你o係間黑房, 等你驚下, 以後唔敢再搞事, 但係我每次入去, 都覺得好好玩, 完全唔會驚.  唔知係咪咁, 自己就覺得自己乜都唔怕….  原來(其實)每個人都會有弱點, 有時o的弱點係不知不覺間出現~~~  最怕o既野, 唔一定係實在, 可以係聲音, 影像都得!!

話說上星期同班同事去食晏, 係食飯途中, 因為伙計無比刀我o地, 同事又懶得叫人拎, 就咁用匙切開塊豬扒, 就係佢手起刀落o既一殺那, 一種刺破耳膜o既聲音 – “吱~~~”, 頂…….  諗起都覺得好難頂呀~~  由細到大, 我最怕聽到呢o的聲, 成個人都會毛管棟, 令我好唔舒服!!  又好似有o的生o左锈o既車仔, 佢o地一路行, 一路發出一o的 “吱吱” 聲, 又係好辛苦!!

當然, 我o既最怕重有好多種,  我最怕蛇啦; 我最怕我亞媽嘮叨我啦; 我最怕考試讀書啦. 

嘩, 講下講下, 原來自己都真係有好多o野係最怕, 最討厭.   

唔知你o地又有無呢???

*圖片取材自 www.skyqzone.com

Published in談天說地

Be First to Comment

Leave a Reply