影帝 – 劉青雲
第26屆香港電影金像獎頒獎禮終於完滿結束! 估唔到大熱o既發哥同城城會輸o左. 由劉青雲奪得影帝殊榮. 不過, 呢三套戲我都無睇過, 都唔知邊個o既演技會出色o的.
當然啦, 發哥係公認好戲之人, 佢o既演技不容置疑, 如果唔係, 佢又點可以做到荷里活巨星呢? 係咪先!! 而城城早前亦憑父子係台灣蟬聯金馬影帝, 我諗佢o既演技都有一定水準, 因為可以做到蟬聯, 唔係咁多人可以. 反而劉青雲我覺得佢o既演技一早已經達到爐火純青o既地步, 而家終於獲得肯定, 我都好開心.
從早期o既 <聽不到的說話> 到近期o既 <我要成名>. 其中有幾部戲, 我好欣賞佢o既演技. 當中有 <高度戒備>, <再見阿郎>, <怒火街頭>, <暗戰>, <新不了情>, <絕世好賓> 等等. 當中有扮演差佬, 有搞笑角色, 有文藝性, 每一部戲中, 觀眾都可以感受到佢係戲中o既用心演繹.
苦等o左 11 年, 終於可以登上影帝, 終於獲得肯定, 恭喜!!
<我要成名>, 真係要去租碟o黎睇下, 究竟點解劉青雲可以借呢部小品製作而奪得影帝殊榮. 期待!!