荃灣區籃球聯賽 – 第四場

日期 : 12/April/2007
地點 : 楊屋道街市室內運動場
賽果 : 41:42 (PISA vs ???)

上星期迎來第四場o既比賽對手, 今次唔知道對手叫乜o野名, 皆因對手件波衫無印到隊名上去.  今次比賽, 差唔多所有隊員都到齊, 真係無乜幾可!! 

今場o既對手, 身高同年齡, 都同我o地差唔多, 賽前都估計會有一番龍爭虎鬥.  唔知係咪因為有個球証遲到, 所以搞到場比賽, 推遲o左成十五分鐘有多先開始, 亦唔知係咪因為熱身多o左, 球員手感變得好好, 比賽一開始, 兩隊都好神準!  今場對比上一場, 一開波已經連入三四球, 開頭五分鐘, 大家都咬得好緊, 但係後來對方七號仔, 好似 Reggie Miller 上身咁, 單係第一節已經射入o左四個三分球, 令到雙方比分拉開到十三四分之差.

後來, 經過暫停, 休息過後, 我o地都叫做穩定返落o黎, 係第二節中尾段就追平比分, 跟住落o黎都係雙方緊咬比分, 可惜, 最後都係以一分之差落敗. 

呢場比賽係我o地第一場輸o既球賽, 大家賽後都有回顧, 總結係
1/ 球證實在執法太差, 遲到o個個球証, 好似紙板人咁, 剩係企係度, 都無吹過犯規, 另一個, 唉….. 由第一場比賽開始, 已經覺得佢吹得差, 要吹唔吹, 唔吹就去吹, 完全唔知佢o既執法尺度係邊. 
2/ 開頭防守比較差, 令到對方射順o左, 個勢係對方度, 一路比人食住.
3/ 教練o既調度失策, 唔應該係追平對手o既時候換人, 令到球員又要重新適應隊友.  

希望大家可以收拾心情, 繼續下場比賽, 繼續發揮出色o既表現!!