喺香港揸咁耐車，都未試過畀人 hit & run，居然嚟到英國就試咗我嘅第一次。本身成日上 Facebook 嘅群組都聽講過英國好多偷車，好多 hybrid 車都畀人偷催化器，亦有好多 hit & run 事件，大家最好裝車 cam。 其實我都有帶車 cam 嚟，不過架車本身個點煙器實在放喺一個太奇怪嘅位置，所以都用唔著個車 cam。何況我個車 cam 都唔係 24 小時長錄嗰款，所以自己覺得小心啲開車就 ok。但係點知原來你自己小心係無用，人哋唔小心你架車都瀨嘢。
話說我泊好咗架車喺停車場，入去買嘢返出嚟之後，自己都無為意架車側邊花咗，但係突然間有個華僑伯伯走過嚟同我講，話我架車畀人 hit & run (18-June)。 即時講咗句粗口，伯伯好好心，佢話佢影低咗架車個車牌，然後就走咗。 我嗰時都唔記得問伯伯抄低個電話，如果我真係報警，起碼有個人證可以證明佢親眼見到呢架車撞花我架車。下次一定要記住 (睬！唔會有下次。) 其實揸車返屋企途中都諗，就算而家報咗警，搵到車主，佢都可以唔認自己撞到我，得張相，又無 video，佢可以死都唔認。 唉 ~~~ 唯有自己硬食咗佢。
返到屋企諗下點整返好撞凹咗又撞花咗嘅側板，諗諗下不如去問下波友有無意見畀我，大家都提供咗方法，用筆油，去 amazon 買啲修補工具或者乾脆唔好整。 大家都係話咁唔好彩，下次泊車要泊單邊位，盡量唔好泊貼隔離架車，呢啲我都明，我都已經唔泊啲大車隔離，就係驚啲人開門閂門會撞花我架車，有單邊位我都泊嗰啲位，但有時唔到你選擇嘛……
正當我諗住買邊款油筆返嚟嘅時候，突然收到一條 message，打開一睇………………
Pages: 1 2