哈哈, 今年我又去台灣旅行啦, 繼上年同班中學朋友去完台中之後, 今年就同朗庭園o既朋友去台南. 點解又係揀台灣? 因為台灣真係好大囉….. 咁o岩港龍又做緊台灣機票o既 promo, 大約 HK$1,300 就有來回機票, 唔去, 真係對唔住自己啦!! 就係咁, 我o地就決定去台灣啦!!
上年台中之旅有團長安排晒行程, 兩手 fing fing 就去o左旅行. 今年就無咁舒服啦, 因為今次係由我負責行程o既安排. 成個行程o既安排大概用o左兩個星期o既時間. 當知道要負責今次行程之後, 就係工餘時間不停咁上旅遊網同埋o的 blog 睇睇人o地o既行程大概係會點, 我諗用o左三至四個網友o既行程湊湊埋埋而整成今次個行程表. 過程中真係頭都大晒, 首先要決定自駕遊定係搭車遊? 如果自駕遊究竟應該要點, 係去o左墾丁先吖? 定係去阿里山先呢? 咁係去o左奮起湖之後再去阿里山, 定係去o左阿里山然後去奮起湖呢? 如果係搭車的話, 行程又會唔同喎!! 由於都唔知團友們係想點, 所以最後我係預備o左兩個行程表比大家選擇, 一個係自駕遊, 一個係去到搭車…. 真係編到人到癲呀!!!!
最後經過一輪咨詢後, 團友們決定係自駕遊. 由於有o左定案, 所以我就根據自駕遊o既初槁再去細執, 好似編排行程時間上就用上o左 google map o既路徑規劃, 大約知道由呢度到o個度o既時間, 再配合網友o既資料, 兩星期後, 終於有o左 final 行程表.
行程搞掂o左, 咁其他o野呢? 酒店? 機票? 租車呢? 放心, 行程表上已經寫晒要去住邊間酒店, book 酒店o既事已經交o左比 Victo 負責. 租車亦已經跟租車公司電話傾妥, 去到就可以開車走人. 機票亦已託 agent 搞掂晒, 什麼航班, 什麼時間起飛回程都知道晒. 所以早一個星期開始就等放假, 去旅行~~~~~
如果大家想知道我o既行程, 可以去下載我o既出發前行程表. 當然啦, 話明係預計, 一定同現實有o的出入, 所以我都另外 post 多一個實際行程表比大家, 等你o地可以下載返o黎睇睇, 作為參考.
下載:
預計行程表
實際行程表
圖片取材自 admin.khh.travel