真係估唔到, 繼六月中去完上海返o黎之後一個月, 又再次出發到意大利…. Wow~~~~ 我衝出亞洲啦!! 唔係再去台灣, 日本呢o的亞洲國家, Yeah~~
今次有幸去意大利, 都係多得亞 Sol 兩公婆, 因為佢o地搵到平機票, 雖然係要轉機, 會比平常多o左四個鐘, 但係唔緊要啦, 最緊要平吖嘛!! 本身同朋友去旅行都無乜特別, 但今次最特別係同一對度蜜月o既人一齊去, 就好似有o的怪咁… 話晒係度蜜月, 當然係二人世界啦, 所以今次唔算係佢o地o既 honey moon, Sol 你要再諗過另一個地方同 Eve 去啦!! 老婆都想過二人世界o架嘛..
今次意大利之旅真係好充實, 分別去o左羅馬, 佛羅倫斯, Pisa, 威尼斯, 米蘭…… 真係太多地方啦!! 而今次旅行去o左成十二日, 真係最長o既一次. 開始時, 大家都話坐長途機會好辛苦, 所以我都做足功課, 以前會著牛仔褲搭飛機, 今次就著o左條運動褲, 一對寬鬆o既鞋, 仲要下載o左幾套日劇, 台灣劇上機睇. 其實都唔係好耐o者, 話咁快就到羅馬開始旅程啦!!
今次成個行程我都無參與, 全部交比邵太負責, 真係辛苦佢. 點解話辛苦佢? 因為我o地知道佢不嬲旅行都無乜點plan, 次次都係去到邊就行到邊睇到邊 , 今次為o左我o地而專登寫行程表, 真係抵讚. 雖然行程安排都有少少亂, 不過唔緊要吖, 下次咪有進步o既空間囉! Anyway, 仍然值得一讚. 所以邵 Sir 你, 真係要用心感受一下老婆所付出的努力啦~~~
今次都要多謝邵 Sir, 因為成程都係由佢帶路, 有佢係度, 我o地一行人都唔需要帶腦出街, 只要帶眼, 四圍睇風景; 只要帶手, 四圍影相; 只要帶腳, 跟住邵 Sir 四圍走. 大家無睇錯, 係走呀, 唔係行呀, 邵 Sir 不枉曾經係體育老師, 佢急促o既步代, 真係令到我o地疲於奔命, 患有骨刺o既我更是辛苦. 而邵 Sir 更被我o地冠名 – 魔鬼教練. 不過, 因為有佢, 我o地都可以去晒邵太安排o既景點, 真係不枉此”走”. 邵 Sir 今次仲充當埋導遊, 原來佢教書時係教歷史, 所以佢成個行程都係度講解歐洲歷史, 佢真係見識廣博.
今次旅行, 最令我吃不消o既唔係食物, 個個朋友都話我一定唔習慣, 大家都知我係一個一日點都要食一餐飯o既人, 所以大家都睇死我唔掂, 叫我買定餅乾, 杯麵. Sorry, 大家都錯晒, 我最頂唔住係天氣, 實在太熱啦, 根本熱到我都無胃口. 當然食物又真係唔多o岩食都有關係. 中國人真係好叻, 口味多樣化, 款式又多, 配搭又多, 反而鬼佬真係食來食去都係o個幾味. (或者因為我無錢去食好o野o掛) 而天氣咁熱, 我真係不停咁飲水, 每見到一個免費斟水o既地方, 我o地都好似蒼蠅咁飛過去, 飲完一口接一口, 然後再斟滿水樽先捨得離開. 我諗我飲o左過去一年要飲o既水. 以前覺得有氣o既水唔好飲, 但係今趟之後, 已經習慣o左. 天氣實在太熱, 頭幾日都係飲汽水, 但係飲得多之後, 就想飲水, 而水就應該係要有氣o既先得, 好似飲完後會覺得解渴o的咁. 連啤酒都日日都要飲一支, 終於知道鬼佬點解咁鐘意飲啤酒啦, 你係會不知不覺咁想飲o架. 經歷o左今次意大利之旅, 我終於發覺自己原來好愛好喜歡香港,
~~~~I Love Hong Kong~~~~
圖片取材自 www.mac69.com
Be First to Comment