今次去上海, 其實最主要係參加斐斐o既婚禮, 當然比o左成幾千蚊去上海, 無理由唔留多幾日, 所以我就留多o左三日咁多, 去睇下上海(大鄉里出城囉!!)…
上海呢期最 Hit 係乜？ 唔駛講都知係世博啦!! 難得山長水遠去到上海, 又咁o岩又有世博舉行, 當然要去睇下啦!! 我無選擇日頭去, 因為大家都覺得日間太熱啦, 熱到溶, 所以決定晚上先去. 早上我o地一行人去o左上海o既地標 – 東方明珠塔, 因為大陸同事話佢o地o黎到上海, 一定要去東方明珠塔先叫o黎過上海喎, 所以就帶o左佢o地去. 不過真係好貴, 東方明珠塔有三個球, 如果要去到最高o個一球, 就要比 150 元; 而我o地另一邊無興趣o既人, 就去o左隔鄰o既上海海洋館.
海洋館其實係因為我o地睇蝸居時見過, 覺得好靚, 所以要去睇睇. 呢個海洋館真係好大, 好多品種, 香港海洋公園真係要努力下… 一個海洋館, 不知不覺都睇o左成 2 個鐘. 以為我o地行o左好耐, 點知東方明珠塔班友仔仲耐, 打比佢o地話開始出發去世博, 係邊度邊度等時, 佢o地居然話仲要比多二十分鐘, 有無咁多o野睇呀… 係 cafe 店等等等, 四十五分鐘後, 終於見到佢o地. 原來上去要等一個鐘, 返落o黎又要一個鐘, 係個球度一個鐘, 所以要咁耐…
去到世博, 第一時間當然係去中國館啦, 學佢o地話, 去世博, 未去過中國館, 點算去過呀… 好, 出發去蒲東區, 由於我o地係蒲西區入園, 所以要搭返架越江線o既巴士過返去蒲東區. 去到蒲東區時準備下車, 有個同事…….
問: 咦??? 幾時越過黃埔江
我: 頭先係隧道時就係過緊江囉.. 我o地唔係過橋呀.. 所以你唔會見到黃埔江!
問: 咦?? 我知, 但係點解無壓力o既?
我: 乜o野壓力?
問: 以前我過隊道時, 會感覺有壓力o架, 點解今次無o既….
我: 吓??? 咁係o個條隊道做工唔好, 正常你係唔會 feel 到壓力… 你唔好再行o個條隊道啦, 分分鐘塌落o黎呀…
講返去到中國館(近看真係好靚~), 見到要排隊入館人龍實在太長, 所以一開始就只係影外觀, 趁太陽未落山, 影張靚相先, 晚間又再影, 真係別有一番風味. 由於園區實在太大啦, 一個晚上根本無可能睇得晒, 所以我o地商量後決定揀選幾個覺得靚o既展館先睇先影. 不過一場o黎到, 無理由唔入去o的展館o架嘛. 我o地就揀o左荷蘭館, 丹麥館去參觀, 因為人流快, 所以好快就入o左去. 其實呢o的展館真係無乜好睇, 所以人流先會咁快. 唔緊要, 點都係叫入o左去, 參與過呢個盛事. 不停走, 不停影相, 好快已經去到晚上十一點, 好多館都關閉, 所以我o地都離開. 如果你o地要去參觀世博, 咁我覺得預兩日時間會好o的, 因為實在太大, 可惜由於我真係無時間, 如果唔係, 我都會係日間再去一次.
上次 Sol 去上海, 去過周庄, 佢話要去一趟, 本身都諗住去周庄, 同里, 是但一個, 但係斐斐老婆話, 如果去呢兩個地方, 不如去西塘, 仲靚, 又多o野睇o的, 我o地當然相信當地人啦, 所以我o地就出發去西塘. 經過兩個小時車程, 終於到了… 全中國都係一樣, 有錢搵就會有, 點解咁講? 因為入去西塘係要購票, 而且唔可以駕車入去, 點知突然有條友仔走o黎話, 每個人算 $30, 我保證你o地可以開車入去. 嘩…. 官方票價係 $60, 你收 $30, 好… 即管試試, 因為唔開車入去, 我o地就要行半小時先入到區. 去到閘口, 本來保安都話唔比入, 條友仔打個電話後, 個保安就擰轉身, 當睇唔到咁, 我o地就順利開車入區了….
我諗西塘同其他水鄉都是差不多, 古色古香, 好靚.. 怪不得連 Mission Impossible 都選係西塘拍攝. 小橋流水, 泛舟湖上, 微風輕吹, 透過相機睇, 成幅風景畫咁呈現係你面前. 係西塘, 比我o既感覺就係個個都好悠閒, 生活無憂… 下次再有機會, 可以試下留低一晚, 看看晚上的西塘.
最後一日, 當然都要去下市中心比較出名o既地方啦, 城隍廟, 田子坊… 城隍廟就係一個古色古香o既商店街; 而田子坊就比較藝術, 感覺好優雅, 好悠閒… 整個上海行, 感覺就係…. 上海仲未有可能追得到香港, 但係物價方面就直迫香港.