朋友今日要返去蘇格蘭啦！佢哋一早已經心儀要去食韓國任食燒烤放題，無理由唔陪佢哋去㗎嘛！好，即刻出發。
由於朋友今日去完街街就會返蘇格蘭，又要揸成七八個鐘車，好辛苦。避免佢咁辛苦，今日就早啲出去食韓烤，即係早啲食 lunch囉！十一點未到就到咗位於 New Malden 嘅 K-Town BBQ。由於附近無乜時租泊車位，所以大家記得去附近 The Malden Center 嘅停車場泊好車，再行 10 mins 左右就到 K-Town BBQ。呢度食放題小朋友真係幾抵，想知有幾抵就一陣睇下面幅圖。不過其實大人個價錢 (£29) 都好抵食，唯一就係只限食 1.5 hrs 比較急趕。如果可以 2 hrs 就好啲。
好啦！講完價錢，就係講質素啦！就算價錢抵食，夠平，但係食物質素差，你哋都唔會再幫襯啦，係咪先！？ 不過既然你哋話有人晨咁早就排隊，質素一定唔會差得去邊啦，但係你哋唔好忘記，呢度係英國，鬼佬嘅口味你有時真係估唔到。不過我可以話畀你哋知，呢間嘢食物水準唔錯，大家可以放心嚟食。 佢哋有分熟食同燒烤區。熟食區有甜酸雞、炒米粉、有壽司…… 燒烤區就有腸仔、八爪魚仔、牛肉、豬肉之類…… 仲有免費雪糕食添！ 口渴？ 可以畀錢加購飲品，無限任飲。如果唔係就只得杯清水，放心，可以免費無限添加清水嘅！大人細路其實都未食夠，但係時間又差唔多，唯有快啲食多兩轉熟食，然後就好滿足埋單走人。
今日主題都係韓國嘢，當然食飽就要去行下韓超 H Mart啦！話明韓超，當然要去入手啲韓超先買得到嘢食物。基本韓超就無英國超市咁大，而且好多種類都唔係只限韓國產品，好多華人食品佢都有售。當然我哋都會揀返啲韓國嘢嚟買啦！仲有樣嘢，就係燒酒喺香港好平，十零蚊一枝，但係呢度就成六七十蚊一枝，真係買唔落手。一講到外國入口，所有嘢都變得貴咗。行咗都有成個鐘，朋友滿載而歸，呢次英國南部之旅就咁結束。不過小朋友已經係咁問，係咪暑假又可以一齊去玩，去邊度玩，佢哋好似好開心，好滿意今次嘅旅程。
封面圖片擷取自 https://www.honestfoodtalks.com/korean-bbq-london/