大家喺香港都知道 HSBC 同恆生櫃員機可以互通，即係你只要拎住 HSBC 或者恆生提款卡/信用咭就可以免手續費喺呢兩間銀行屬下嘅提款機拎錢。 而中國銀行，渣打，或者其他銀行則可以透過銀通標貼嘅櫃員機免手續費拎錢。當然你話，唓！我喜歡畀錢用 HSBC 喺銀通櫃員機拎錢唔得咩？可以，當然可以啦！你大把錢嘅話，你鍾意點都得啦！但係我哋呢啲平民百姓，邊有咁多錢可以浪費呢？所以嚟到呢度，如果你係以上所講大把錢嘥嘅人，你可以先行離開，呢個 topic 根本唔關你事。
大家都知道去外國櫃員機拎錢要畀手續費，所以大家去旅行前都盡可能喺香港先兌換晒啲錢先過去。因為大家都唔想每次拎錢時要畀手續費嘛，慳得就慳。點解講呢個 topic？事緣有日我帶過嚟嘅現金都洗晒，咁要去搵櫃員機啦！好彩當日喺大街，有間 HSBC 可以畀我拎錢。但係 HSBC 其實喺英國唔係咁多分店，咁唔通每次我都要返去呢度拎錢？ 不過要拎錢嘅機會應該唔多，因為英國呢度好多，應該話大部分都可以用 card 去付款，選擇都好多，可以用 contactless 信用咭，Apple Pay，Google Pay，根本你只需要有手機就可以畀錢，拍一拍就搞掂，方便快捷。不過凡事總有例外，就好似我之前有講過嘅一間中式餐廳，佢哋就係只接受現金，信用咭免問。所以我都會準備現金傍身，加埋上網有睇過，話啲當地人都教，點都要袋啲錢喺身，萬一有人打劫，佢有啲錢拎咗都唔會傷害你咁話。
其實嚟到英國第一日，我已經有留意到街上有大大小小嘅櫃員機寫上咗 Free Cash？ 究竟係乜嘢嚟嘅呢？唔駛錢？乜嘢意思？ 自已又唔好意思問人，又無求知慾去網搵答案，久而久之就無咗件事。直至……………
話說有日同朋友去買嘢食真係唔夠錢，要去櫃員機提款，咁我就同朋友行去大街嘅 HSBC 啦！其實沿途都經過咗好多呢啲 free cash 櫃員機，朋友都有啲疑惑，見我經過一個又一個櫃員機都唔去拎錢。終於差唔多行咗半條大街，佢出口問我想去邊度拎錢，我當然答佢話要去返 HSBC 啦。跟住佢問我做乜堅持要去 HSBC，其實周街嘅櫃員機都可以拎。吓？ 唔係嘛！HSBC 提款咭可以喺其他機度拎錢嘅咩？唔駛畀手續費咩？朋友跟住就解釋，如果你見到 Free Cash 字樣嘅櫃員機, 其實係免手續費咁解。呢度唔係香港，HSBC 唔係一定要返去 HSBC 櫃員機拎錢，所以下次要拎錢，記得去搵呢啲印有 Free Cash 字樣嘅櫃員機啦！自己呢鑊真係用咗香港 mode，唔可以再咁傻仔先得。
