今日突然收到 DVLA 寄嚟嘅 UK 駕駛執照啦，YEAH~~~ 真係好驚喜，估唔到咁快手。 由寄出郵件 (15-March) 到今日 (25-April) 收到信，都只係一個月鬆啲，仲要張駕駛執照裡面嘅內容無錯，真係 very good！
大家上網都應該搵到好多關於點樣由香港車牌轉做英國車牌嘅教學網站，我都唔多作介紹，不過我都列舉一個比較有用嘅網站畀大家。呢個網站內容幾好，真係教你點樣填張 form 去申請換牌。
有樣嘢提提大家，記得去郵局寄件嘅時候要選用 Signed For 1st class 服務，咁你就會有個 code，可以上返去郵政網站 check 下你份件幾時到幾時有人簽收咗。
另外，DVLA 地址記得睇返張 form 就會見到有。因為我上網見唔同網站都有啲唔同，所以最好就係睇張 form 裡面地址，費事一陣寄錯咗就麻煩。
另一樣嘢就係好多網站都話要住滿 180 日先可以去換車牌，但其實就唔需要，我落地半個月就已經去申請，都無問題。 當然，可能我比較好彩，你就。。。。自己衡量一下風險。
最後，收到張 license 之後，記得對返 license 上面嘅資料。因為上網睇，好多網友都話 DVLA 將出生地寫咗做 China，你個名又可能會錯，總之要小心 check 清楚。如果真係錯咗，佢封信裡面有張 form，填返好正確資料後就再連同 license 一齊寄返畀 DVLA 叫佢更正，大約兩三個星期就會收到張新 license，當然到時又要 check 多次啦。
封面圖片取材自 www.holidayextras.com