Skip to content

Kung Fu Panda & Hancock

一連兩日去o左睇戲, 星期日一大早十一點半係元朗睇功夫熊貓.  星期一夜晚就去o左睇 Will Smith 主演o既街頭超人.  星期日係睇早場, 元朗百老匯睇早場真係抵, 只係三十個大洋, 由於我o地上網訂飛, 所以要比六蚊雞手續費, 真係抵到爛.  所謂o既早場, 只不過係十一點半(中午啦), 所以起身都唔算太辛苦, 如果你話以前睇九點半場就真係有o的早啦.  睇完戲仲可以同班朋友去飲茶吹水, 消磨一個下午, 真係一個好好o既節目.

講返呢兩套戲先, 佢o地都無令我失望, 都唔錯.  尤其係功夫熊貓, 佢o既動畫水準非常高, 你可以清楚咁見到熊貓身上o既毛毛, 好立體感; 武術動作場面又一絕, 講大豹逃獄o個一幕, 真係拍爛手掌, 動作場面設計得好有心思, 而訓練亞寶o個幾幕, 真係睇到人會心微笑, 總括o黎講係一套高水準o既製作.  而且成套戲, 好有教育意義, 唔知大家有無領略到呢?  我自己就領略到凡事都有可能, 凡事唔係一定o既, 最重要係自己點睇自己o既o者, 你話自己得…. 就得o架啦, 掂硬o架.  不過大家睇完之後都有一個問題, 點解會咁周星馳 feel, 咁港產 feel o既?  好多笑位都係香港式, 唔知夢工場係咪因為功夫關係, 所以搵o的笑料都係港式呢?  不過可以睇得出, 無論大小朋友都好喜歡呢套戲, 大家都笑得好開心.  

另一套係 Hancock, 近期睇得比較多 Will Smith o既打戲, 好似 I am Legend, 今次睇返佢o既搞笑戲路 – Hancock, 真係好過癮.  睇 Trailer 時已經知道佢係一個做多錯多o既超人, 應該會好好笑.  但睇完成場戲, 原來又唔係咁o既一回事.  成套戲無乜大場面, 只有一場械劫案, 子彈橫飛, 係咁爆炸, 好激.  成套戲係好似 Spiderman 3 咁, 係講街頭超人o既內心世界, sell 愛情, 溫情, 最令我估唔到, 原來超人係有弱點, 無諗過會有咁o既橋段.  其實o個幕係醫院, 真係好悽美.  雖然無大激戰, 無怪物襲地球, 但係而家從另一個角度睇超人, 可以感受到超人所面對o既困難, 超人都有超人o既難處, 苦處.  

 吖, 未講我係邊度睇街頭超人, 今次我選擇o左圓方裡面間戲院 – The Grand Cinema, 一個字o黎形容, 正.  座位寬闊, 舒適, 而且佢最特別係o的座位會有震動, 當有大爆炸o既時候, 會令你感受其中, 如果可以震得厲害o的會更好, feeling good~~ 不過稍為要彈一彈係佢o的聲音太尖, 斜位角度唔夠, 始終都會比前面座位遮o左少少畫面.  但係整體o黎講, 聲音, 畫面, 都係一絕~~~  大家可以去感受一下!!

Published in影音天地

Be First to Comment

Leave a Reply

Your email address will not be published. Required fields are marked *