近排又再次迷上o左玩 TV Game. 自從換o左 LCD TV 之後, 感受到大電視畫面之下打機o既震撼感覺, 加埋陳奕迅出o左隻 HD o既演唱會, 更加加速o左我走向 HD o既世界. 當然, 要走向 HD 世界, 除o左要有符合 1080P o既 TV 之外, 你都要有一部可以播放 HD o既 player. 睇返市面o既 player, 差唔多部部都過 $4000, 而 PS3 只係 $3000 多少少, 就可以播 Bluray, 又可以打機, 一舉兩得.
所以早排走o左去買o左部 PS3 返屋企, 當然第一時間即時播隻 Eason o黎睇睇啦, HD 真係靚到不得了. 不過可惜暫時仲未能夠享受得到高清電視播放, 皆因青山發射站仲未啟播, 暫時只有試播訊號. 剛係網頁睇到, 大約七月就可以正式啟播, 到時真係睇電視都係一種視覺享受, 唔駛再受呢個鬼影, 雪花o既折磨了. 但係到時又要比錢買高清機頂盒, 又要破財~~~
講返 PS3 先, 由於買機要跟機買一隻 game, 所以我選擇o左 NBA 2K8 作為我o既首隻 game, 而第一隻 bluray 碟係 Eason 演唱會. 近排唔知係咪因為 NBA 收鑼, 搞到我好想搵隻 NBA game 打下, 咁當然呢隻 NBA 2K8 絕對唔能夠放過啦, 而家幾乎晚晚都要打一場波先收手. 講下隻 game, 打開畫面, 睇下demo, 不禁嘩一聲, 畫面真係好靚, 完全想像唔到遊戲機可以做得咁真, 咁靚, 球員動作又多又似, 連觀眾席上都有好多變化, Bench 席又係動作多多, 表情多多. 連個別球員o既動作都跟足晒, 好似波士頓o既 Paul Pierce 射罰球時o既動作, 完全一樣, 配合埋屋企套 hifi 出埋 5.1 聲道, 臨場感十足, 離遠睇仲以為真係播緊現場添.
除o左畫面靚之外, 當然佢o既趣味性亦十足啦, 如果只係得畫面靚, 但耐玩性唔足夠o既話, 同樣會比我評為係爛 game 一隻. 佢抵讚o既地方係 2K8 裡面有好多唔同o既進攻模式, 防守陣式比你揀, 多得o黎又唔會話太複雜, 搞到你無癮, 玩落好有趣味, 暫時仲未熟習, 希望多加練習之後可以每場都 win 啦.
NBA 2K8 另一個我喜歡o既原因係因為佢入面有好多其他國家o既球隊比你揀, 你可以中國隊 vs 美國隊, 如果一覺唔覺意比你打敗埋美國隊, 你話感覺幾好呢. 如果將來可以用國家隊參戰埋 NBA 常規賽咁就真係好囉, 或者加多個國家盃賽都好. 而家就好期待佢o既 NBA 2K9, 究竟會變成點, 可以有幾多進步.
高清小貼士:
講開高清, 講多少少比大家知道. 其實好多人都會誤會數碼廣播就係高清, 唔係o架, 大家唔好誤會. 數碼廣播利用數碼方式廣播影像和聲音. 數碼訊號唔係用連續的模擬訊號廣播, 而係以分立o既資訊數元傳送. 數碼電視可以提高畫面o既質素, 而且消除討人厭o既「鬼影」和「雪花」等接收問題. 而高清就係講緊格式, 即係解像度方面, 而家大家所睇到o既模擬訊號最高解像度係 720(水平像素) x 576(垂直像素), 而高清o既最低解像度至少為 1024(水平像素) x 720或以上(垂直像素), 所以大家睇高清格式會覺得特別靚就係咁解啦. 大家又會問點解有時會聽到標清, 咁同高清有乜分別呢? 其實標清廣播可以視為傳統模擬電視廣播o既數碼版本, 因為兩者o既屏幕模式和解像度都相同, 由於標清同樣係數碼廣播, 所以都係無雪花和鬼影o既. 大家清楚未? (讀者: 都唔知你講乜鬼)