Skip to content

尊貴會 BBQ

早排 Skyers 尊貴會繼晚飯之後, 又搞o左個 BBQ 比班會員參與.  今次好高興得到各位會員o既踴躍參加, 亦多謝 BoBo 借出場地同埋負責食物安排, 仲有當然要多謝Tony 哥負責食物之餘, 佢仲係酷熱o既天氣下負責燒o野食比我o地啦, 真係辛苦晒兩位大廚.  

先講下o的o野食, 真係無得頂, 有义燒, 有煙肉帶子, 煙肉腸仔, 雞全翼, 雞中翼, 牛扒, 雜菌, 銀雪魚, 沙拉, 糖水等等….  真係豐富到不得了.  食到肚到漲晒, 唔係誇張, 粗略估計, 我應該食o左成 5 至 6 隻雞全翼, 又食o左雞中翼 3 至 4 隻, 剩係食雞都食o左咁多, 你諗到都知係好食啦, 食飽後真係怕自己會變肥豬…..  

係當晚, 我o地尊貴會仲安排o左特別表演, 慕求大家係吃喝之餘, 仲可以得到玩樂開心o既感覺.  我o地當晚請到物理治療巨星 Ken 哥飾演騙徒A, 行政之花 Amy 飾演騙徒B, 其他人則飾演路人甲乙丙丁, 佢o地演出o左警訊經常都有播放o既街頭騙案之神醫(詳情可以瀏覽相冊). 大家睇完之後都捧腹大笑. 真係多謝兩位o既傾力演出.  

經過一輪狂風掃落葉之後, 我o地大家都飲飽食醉, 唔知係咪年紀大, 大家都唔可以再捱夜, 所以清理好晒o的o野後, 大家就好滿足咁離開 BoBo 屋企, 回家了.

其實一班好朋友開開心心聚埋一齊, 傾下o的無聊o野, 講下笑話, 真係好好.  人生就係咁o者~~~

圖片取材自 Line Friends

Published in朋友

Be First to Comment

Leave a Reply