Skip to content

年紀大, 機器壞

細細個已經成日聽到o的人咁講, 年紀大, 機器壞.  以前只係覺得幾得意, 幾押韻.  估唔到呢段o野又真係講得好o岩.  人就好似o的機器咁, 日日不停咁郁動, 不停咁做運行, 當運行得咁上下時間, 點都會有o的毛病會出現.  好似o的廣告咁講, 門較開得多, 郁得多, 都會鬆, 所以要食乜乜乜.  人都一樣, 郁得多, 長時間無休息, 身體各處都會有勞損.  無休息, 身體又點會可以修復受損部位呢?

好似自己咁, 膝頭都已經受損, 打親波都會痛, 而家仲要戴埋護膝, 好好咁保護自己.  多年o黎身體各處都發生過問題, 曾經試過腰痛, 記得o個一次, 坐係 sofa 度睇緊電視, 突然間腰痛, 痛到我標晒眼水, 我到而家仲記得o個種痛法, 仲要令我成晚都瞓唔到, 第二日就”的”起心肝去搵我個御用物理治療師睇睇究竟係乜事幹.  其實身體仲有好多毛病, 而家未發出o黎, 我諗如果自己仲唔好好咁保養下, maintenance 一下, 再過多幾年身體都唔知會點殘法…

其實自己都叫好彩, 身體從來都無乜大毛病 (touch wood), 又唔會有乜長期問題困擾, 又無乜做過大手術.  大家如果有留意我個 blog, 都知我朋友 Sol 佢因為斷o左韌帶而做過手術, 一個不嬲玩開運動o既人都會受傷, 你話係咪要好好睇住自己身體呢?  早一個月前聽到一個消息, 就係以前 Miss 個老公, 佢因為心肌肥大而差點無命, 唔好以為佢老公好肥呀, 其實佢老公係一個運動健將, 曾經係香港籃球隊成員, 香港手球隊成員, 一路幾十年以o黎都有玩運動, 但就完全係無預兆o既情況下, 打打下波就出事.  

早幾日我係大陸時, 收到 Victo sms 話團長入o左院,  即時打電話比團長詢問情況, 原來佢多日來都發燒, 最高係燒到 109 度添, 又退唔到燒, 所以就送o左入院.  上星期六去o左探佢, 佢經過護士o既悉心照料之後, 已經退o左燒.  不過醫生 check 到佢有肺炎, 身體又差, 所以要做埋詳細o既檢查之後先可以出院.  睇見團長個病樣, 真係估唔到連團長呢一個鐵人, 都會有跌低o既一日.  我o地大家都估計, 團長都係積勞成疾, 平日係咁做, 日又做, 夜又做, 瞓得幾個鐘又起身繼續做, 佢真係為公司而生, 為公司而病呀…. 

今日打電話問團長病情時, 係電話中傳來佢微弱o既聲音, 唔知係咪比我嘈醒定係因為剛剛係手術室做完 body check 出o黎, 所以把聲先變成咁.  Anyway, 點都好, 希望團長快o的好返, 出返o黎主持大局, Skyers 尊貴會唔可以無o左團長英明o既領導, 所以團長, 你要快o的好返..  我o地等緊你搞活動o架!!!

認真o的!!!  講真, 團長你真係要好好咁休息, 做下運動, 唔好飲太多酒, 唔好捱夜, 唔好比咁大壓力自己, 你再係咁落去, 身體真係會頂唔住o架!!!  朋友們, 你o地都係呀, 

保重身體.

圖片取材自 ebenezer-ebenezer.blogspot.com

Published in朋友

Be First to Comment

Leave a Reply