本地波？ 乜嘢本地波呀？你講足球？英國最出名當然係足球啦！不過可惜我唔好呢樣。我講緊嘅係籃球啦！ 一嚟到英國，除咗安頓好一家人之外，另一樣我好上心嘅就係搵邊度可以打籃球。而家科技咁進步，除咗 Google 大神之外，如果要搵興趣同好，facebook 就係最好嘅途徑。
先先搵啲 group 入組，然後逐個 post 睇下有無講籃球嘢，其實都睇咗好多 post 之後先睇到一個關於各行各業嘅 post，裡面有個 doc file 列出晒呢區有乜嘢專業人士，興趣小組等等嘅資料。 例如你想搵個香港髮型師幫你剪頭髮，你可以喺呢個表見到有兩三個髮型師畀你打去問問有無期；又或者你想搵啲興趣班，好似我咁搵到個籃球群組，加入去就可以見到幾時有波打。 個表仲會定期更新，有需要你都可以去 facebook 搵下。
講返籃球先，加入咗 Signal group 之後先同 group 裡面嘅人查詢一下打波詳情。 原來逢星期五都有打籃球活動，不過要先到先得 ( 每次只得 20 個名額 )，幾時報名唔定，要自己𥄫實個 group，好有壓力。 好彩皇天不負有心人，畀我報到名，今次有波打啦！
以前打波都係去免費場，唔駛錢，呢度打波就要夾錢打，每位 £4.8，每次打 2 個鐘。 20 人打 2 個鐘每人可以打幾多分鐘呢？ 如果個個都餓波 ( 即係爭波打 )，咁咪好快打完？ 會唔會打得唔夠皮。 啲人又係乜嘢年紀呢？ 後生仔多定啲老人家多呢？ 唔理啦，去打咗一次先，發覺唔對路就搵個第二個 group。
第一次參加呢啲群組嘢，真係有啲擔心，有啲緊張。終於到咗打波嘅日子 (18-March)，開車出發，睇住 Google map，話咁快就到咗目的地。 唔知係咪呢度無會所或者一啲公眾體育館畀市民租用，我見大部分人都係會去租用學校嘅體育館，我哋都唔例外。一個好普通嘅室內籃球場，一班唔戴口罩嘅 HongKonger，感覺真係好神奇。 我都已經叫早到 ( 6:30pm )，居然已經有成 9 個人喺度射緊波，加埋我就 10 個，佢哋都唔理我喺邊個，大叫快啲嚟鬥波。 感覺真係好似中學去打街場咁，三五七個唔識嘅人 join 埋一齊打，為咗乜？ 鬥波囉！ 開心嘛！大家都係鍾意籃球而聚埋喺球場。 而家一樣，千里嚟到英國，大家三五識七，話之你係邊個，快啲開波打 ( 好熱血 )。 呢 2 年我去打波都一定要戴口罩，今次終於唔駛戴，可以好好咁呼吸，感覺好好。
打籃球嘅時間真係過得特別快，話咁快就 2 個鐘。之前所擔心嘅嘢都無發生過，打得好滿足，好開心。 由於有成三四個月無跑步練氣，又無打籃球，感覺自己跑起上嚟好重，好攰。而 20 個人打 2 個鐘都無發生爭波打嘅情況，呢度打波都好公平。 之前佢哋已經 set 好咗規則，分 4 隊，每次打 10 分鐘，打 15 分。法定時間內兩隊都分唔到勝負，咁兩隊都要 Out，換另外兩隊入嚟打。如果其中一隊贏咗就可以留低，換另一隊入嚟。係咪可以一直贏落去打，Sorry，唔得。只要你嗰隊連贏兩場，咁你都要落場讓畀另外兩隊打。 咁樣大家都可以打得夠皮。
而家加加埋埋大約都打咗十次八次，大家都熟絡咗，打起波嚟都多啲嘢傾。早排大家仲開咗個飲酒 group，逢星期一晚去飲酒吹水。 最近仲要話打完波去飲多次，可惜我唔習慣身水身汗咁去飲，睇下搵日星期一晚落去同波友飲下嘢吹下水，認識大家多啲先。
