嚟到英國，好多人話要申請一張會員咭。因為只要申請咗，你可以一年內免費任去指定嘅公園、莊園、城堡，好著數。 National Trust 出嘅會員咭就係咁用，佢分咗個人，家庭，長者等等種類，如果你哋有興趣，可以去官網睇下。
喺英國會見到好多公園都有一個小橡樹嘅標誌，咁即係代表呢個公園係由 National Trust 做管理。唔好以為 National Trust 係政府機構組織，佢哋只係一個第三方非牟利機構，所以需要市民大眾申請做會員，收咗嘅會費會用嚟做保養保育維護等開支。
好啦，講咗咁耐，其實我想講乜？ 其實係想講我誤打誤撞咁 join 咗 member。 事緣兩小妹放 term break，諗住搵啲地方去。我哋兩老商量緊嘅時候，老婆話不如去我跑步經開嗰個大型公園 (我哋叫佢做森林公園)。初時都只係諗住去行下，睇下有乜遊樂設施，或者整定 lunch box 去公園野餐咁嘅啫。 而且嗰度有停車場，可以方便泊車，咁我就八卦想睇下個停車場收費幾多，上網搵搵下，見到原來個公園咁啱星期六日 (28-29/May) 有好多 event 舉行。 睇下睇下，啲活動都幾好，Bug Hunting、Butterfly Walk、Beekeeping Talk、River Dipping、Flowers and Trees Walk 等等。呢個 event 一年只得一次，梗係畀小朋友去參與下啦。
再睇下網站，發覺原來可以 join member，除咗可以免入場費之外，仲可以有免費泊車添。今次我去呢個公園本身就免入場費嘅，不過如果你去其他景點，可能就要收錢。 公園泊車本身有 1.5 小時免費，過咗之後就 3 鎊 3 個鐘，其實都算平。公園裡面有餐廳，有商店，我見都有好多人嚟公園商店買花園嘅嘢，泥、除蟲劑、工具，所以 1.5 小時免費泊車都夠晒用。仲有啲人係入嚟餐廳食下嘢，嘆下咖啡。
講返今次 event 先，泊好車就入去報名，由於行動力太慢問題，嚟到只可以參加 12:30pm 嘅 Bug Hunting 活動。 仲有啲時間就附近周圍行下，影下相先。呢度真係好有心機打理，如果有多啲時間發掘打咭位，一定可以影到好多靚相。呢度有個花園仔叫做 Rose Garden，好明顯就係種咗好多玫瑰，啲花開得好靚，種有唔同顏色嘅玫瑰花，妹梅不停走埋去同啲花鬥靚，謀殺咗我好多菲林。 行得咁上下，諗住貪方便，大家只要橫過條小溪就可以過對面，而且條小溪已經特登整好咗條石仔路出嚟畀人行。家家先出發，由於要放啲水穿過石仔路，所以最尾嗰段會無咗石仔，咁就要大家跨過去路面上岸。 但就喺呢個時候，家家話自己跨唔到 ( 點呀？一小段都跨唔到？唔係嘛！？)。 我唯有喺佢後面扶住佢，等佢一隻腳踏咗去對面之後，再叫佢提埋另一隻腳過去啦！ 點知呢個時候，佢話唔得啦，要跌啦。本身諗住試下用力托返佢企返正，可惜佢嘅無情力太勁，就咁一嘢拉埋我一齊跌咗落水。 都真係好唔明白，兩隻腳都踏住地面，點解會失平衡。 成身濕晒可以點？ 揸車返屋企換衫囉，好彩屋企唔太遠啫。 就係咁，搞到我哋兩個無得去 Bug Hunting，返到屋企仲要發覺無…… 鎖匙，喺花園等一個鐘等 Mimi 佢哋完咗個 Bug Hunting 先可以返去問佢拎鎖匙。好彩花園晾咗啲衫，有衫有底褲換，如果唔係真係會凍到嘔。
換好衫，又再返去公園食個 late lunch 先。餐廳啲嘢食都唔算貴，價錢同出面咁上下啦，食物選擇都係少啲。 不過意不在食，快快脆去報名參加 Butterfly Walk。 Oh，Shit ~~~ 記錯咗，原來得返 Flowers and Trees Walk，無計，唯有照報，體驗一下。 乜嘢叫 Flowers and Trees Walk？ 根據妹梅報告返 Bug Hunting 好好玩，會有個捕蟲網畀佢去捉昆蟲。捉到之後就放入去個罐度，罐蓋係透明放大鏡，咁你就可以從上面睇裡面睇得好清楚。而且義工們仲會同你講解一下昆蟲知識。時間到，集合。今次有三個義工帶住我哋去附近介紹下啲樹有乜特別。雖然係英文，都大約聽得到五成嘅。 唔明就問下老婆佢講乜囉。成個行程原本預 45mins，但係都 over run 咗成 20 mins 有多。因為義工們好有興趣講解，團員們又好有興趣了解。我諗義工們最希望遇到呢啲團員，咁就會好有動力去講解。 避免日後我都唔記得，喺度寫低佢哋講過嘅嘢先。
- 有啲樹，千祈唔好泊喺佢下面，因為會有好多蟲嘅分泌物黐住喺樹葉度，等到一定重量，啲樹葉承受唔到分泌物嘅重量，咁就會跌落去地面，如果你架車泊喺下面, 你諗下你架車會變成點？
- 桑樹原來有分黑同白。以前英國人諗住種桑樹畀啲蠶食，咁就可以用佢嘅絲做衫。但係英國人估唔到佢哋種嘅桑樹係黑桑樹，啲蠶只係食白桑樹嘅葉，所以如意算盤打唔響。但係黑桑樹啲果實又可以食得，咁就繼續種嚟食啦。
- 原來受精咗嘅花會變咗粉紅色，即係話畀其他人知道佢已經受溝咗，你哋唔好再嚟搞我。好得意。
其實仲有其他，不過都唔太記得，等下次有機會再參加，再了解大自然先得。兩個小朋友都好鍾意，好喜歡今日嘅節目 (除咗跌落水嗰個)。 為咗唔好浪費咗個會藉， 一定要去多啲 National Trust 嘅景點先得。
