真係無諗過會咁快入戲院睇戲，不過個個都話好睇，勁正。老婆又話不如去睇，咁啱又見到有特價飛，£7 就可以有兩張飛，咁就硬住頭皮去試下睇啦！
其實之前上網都見到話好正，但係波友 group 嘅朋友仔又問邊間戲院有字幕，當然唔係講中文字幕啦。大家話英文字幕都已經好好，始終英文唔係我哋嘅 mother language，齋聽始終都唔可以完全聽得明白，所以大家都話如果可以有英文字幕嘅話會好好多。 但係英國本身唔係太多戲院會有字幕版，而最近我嗰間戲院正正就係無字幕，咁我究竟點算好呢？
原本真係無諗過睇戲，一來不嬲都無乜癮入戲院，二來全程英文又無字幕，都聽唔明，去嚟做乜呢？ 不過咁啱上去 VOXI 網站 check 下用咗幾多 data 流量，又咁啱畀我見到佢有優惠，可以用 £7 買兩張 Vue 院線嘅戲飛，無理由唔去啫 (謎之聲音：CHEAP 精)。
就係咁，我奉獻咗第一次 (9-June-2022) 出嚟畀 Tom Cruise。香港戲院講緊一個地方要切做好多個迷你影院，搞到啲座位又迫又窄，有人出入你仲大鑊，要企喺身畀人過。英國嘅戲院又係點嘅呢？ 英國嘅戲院會唔會好大，好舒服？ 你又諗多咗。成間戲院係好大，佔地好廣，但係裡面一樣切咗做好多間迷你影院，只不過每間迷你影院嘅座位就好寬敞，前後排相隔好闊，張座椅仲好鬼舒服，佢張座椅可以伸長出嚟畀你晾腳添 (座位同座位之間幾咁闊)。
睇戲當然唔少得食爆谷，呢度都有，仲有好多種類畀你揀。飲品你可以揀咖啡、啤酒、汽水、仲有奶昔添；食物就有糖、爆谷、熱狗、Nando，真係總有一款啱你。呢間戲院仲有一個 corner 放咗好多橡皮軟糖畀你買入場食，選擇多到你會有選擇困難症。未夠鐘入場睇戲？唔怕，坐喺大廳個等候區，吹住水等夠鐘入場都得。係咪覺得好好呢？ 呢啲硬件配套係好好，但係我哋香港人太習慣香港嗰套，一夠鐘就開始，好準時㗎嘛。但呢度嘅廣告多到你唔信，連埋下期放映嘅預告片佢都播埋，差唔多半個鐘後先正式播 Top Gun。 原本 11:55am 開場，搞到成 12:20pm 先正式睇戲，話時話，今年都真係未試過睇咁多廣告，而家睇返夠本。
再講聲效，可能呢間迷你房關係，我自己感覺就一般般，一大聲嘅時候就聽到喇叭有拍邊問題；Surround sound 都有，可以清楚聽到飛機由左飛向右，隨住人向前行，人聲都會愈來愈遠，呢啲基本嘢都做得到。但係我硬係有啲投入唔到套戲，可能由於我同塊大銀幕相隔太遠嘅關係 (其實我買咗 G 行，即係第 7 行)，好有距離感。下次要買前返幾行先得。
總體而言，呢度睇戲都幾正嘅。如果我英文可以聽到再多啲啲，咁就好。而家要好認真去睇，去聽對白，變相又令到我投入感少咗，希望之後我可以聽得明多啲英文，咁就可以好好咁去 enjoy 睇戲！
套戲點樣？好唔好睇？ Top Gun 第一集嗰時我已經覺得好好睇，呢啲戰機片真係男士們最愛。今集 Top Gun : Maverick 更勝上集，始終第一集已經 30 年前拍，而家科技咁進步，器材又咁好，拍出嚟都真係好唔同。 成套戲都編排得好好，有溫情，有愛情，有手足之情，當然唔少得空戰場面，真係好真實，好緊湊。 我都 recommend 大家去睇，我諗如果大家手頭有啲銀両，可以去 IMAX 戲院睇，應該會更加好… (謎之聲音又再出現：CHEAP 精)
封面圖片取材自 we-love-cinema.com
