話說有一次諗住周圍跑下，其實都係諗住圍住屋企附近咁跑下 5K 或者 8K，點知跑跑下又好似幾有力，仲跑咗去隔離 town。跑到去隔離 town 突然落雨，就係咁就抖咗一陣。唔知係咪抖咗一下，對腳又上返電，見到都只係跑咗 7K 咁上下，不如再跑多少少去到 10K 啦。 就係咁繼續跑，跑到去咗溫布頓。本身見地圖話去溫布頓網球場都係再多 3K 左右，諗住不如都跑埋去啦，但係呢個時候，headphone 傳嚟一聲 battery low。 再望一望部電話，得返 10% 電，再跑落去嘅話，我怕我會唔識返屋企。 不過都好好笑，由於跑到去溫布頓都已經成七點幾左右，你諗下由屋企跑嚟都要成個鐘，咁我又無咁好體力可以跑返屋企，電話又無乜電，咁點算。 即刻打開 google map，搵下屋企方向，規劃好路線，睇下附近有無巴士可以搭返去，咁樣整一整，電量即時得返 5%。見 google map 規劃搭車路線好複雜，又要轉車，我諗入到閘，但係出閘時電話無電，咁我點出閘。 附近又無巴士搭，即刻再望下大約路線點行返屋企。 中途係咁望路牌，好似汽車咁沿住馬路行，終於經過 2 個鐘左右嘅時間，我成功返到屋企啦！
經過呢次跑咗去溫布頓，心裡面一直想試下直接跑去溫布頓網球場，睇下 google map 都只係大約 8K 左右咁上下，呢個距離 ok 啦。不過最大問題係跑咗去又點返嚟呢？ 不過又諗，其實都係 8K 啫，可以去到打下咭，抖一陣然後再跑返 5K 返去，咁都係行 3K 左右啫，諗落又好似 work 喎，一於下次就咁做。
本身諗住隔一個星期就再跑，點知想跑時又落雨，唔落雨就好凍，唔凍唔落雨就到我傷風感冒。今日 (16-May) 叫做好返啲，見朋友仔噚晚跑咗，今日就決定唔理點都好，去跑一次。經過上次經驗，今次電話、headphone 叉足電先出發。之前已經睇咗大約路線，加上上次行返嚟嘅經驗，都知道點樣跑，只係需要去到溫布頓 high street 之後要揸住電話睇路線跑。明明睇過話大約 8K 左右就到，點解我跑到去 high street 都只係7K 左右？ Anyway，都未到網球場，都係要繼續跑。跑呀跑，搞乜個球場咁遠，仲要上山嘅添，咁斜真係想跑死人咩！唞晒大氣，腳都抬唔起跑呀！忍住，行都要行到去網球場。做乜嘢都好，都係只有經過辛苦，之後你先會體驗到美好嘅收穫。經過一輪攀爬，我終於見到我嘅曙光喺前面啦 – 溫布頓網球場。
咦？搞乜？裝修？ 周圍都係工程，完全見唔到裡面嘅環境，失望。唯有四圍外邊影下相，影下啲打咭位啦。喺外圍行咗個圈，真係無乜嘢好影，反而影咗好多房屋，呢區應該係貴區，啲屋又靚又大。講返網球場，真係好大，就咁睇，裡面應該有超過 20 個網球場，睇返官網，原來佢有咁多個場 ( The Club grounds consist of 19 grass courts (including the Centre Court and No. 1 Court), five red shale courts, three Continental clay courts, one American clay court and five indoor courts, (two Greenset Velvelux and three Greenset Trophy) )，當然主場 ( Center Court ) 就更大啦。裡面亦有 shop 畀你買紀念品，同埋裡面都有間 museum。雖然我對打網球就無乜興趣，不過下次可以同屋企人去睇下，話晒都係英國其中一項大賽。
好啦！問題嚟啦，我點返屋企呢？ Google Map 話呢度返去搭車都要成個鐘，仲要左轉右轉，不如我行返落去 high street 之後先再搵巴士啦！行返落去 high street 都要 30 分鐘左右，見仲未搵到巴士站，又口渴兼肚餓，走咗入去 Tesco 買咗啲麵包嘢飲。感覺自己好似一個流浪漢咁，一手揸包，一手揸支嘢飲，邊行邊食邊飲。Google map 教極都係話坐火車，左轉轉右轉轉，太麻煩。我索性繼續好似上次咁行返屋企，再過多 20 分鐘左右，我又見到另一度曙光出現啦！前面個巴士站……… 嗚嗚嗚……… 147號巴士呀！好感動呀！仲要剛剛好，唔駛等，即刻有架巴士埋站，嘟電話上車坐低，話咁快就到咗屋企附近，順利返歸。
咁樣出去跑一跑，搞咗差唔多 3 個半鐘。我 5 點出發，8:30 先返到屋企。其實只係圍住屋企跑 10K 都只係 1 個鐘，咁樣跨區跑真係搵自己笨。不過其實咁樣做有另一個目的，就係可以認識多咗個社區，可以容易認得周邊環境。如果唔係上次咁樣跑一跑，我就唔會發現原來隔離 town 有個咁大嘅商場，Sainsbury’s 又可以泊 4 個鐘，附近又有 M&S、Currys、KFC、Next、Lidl、Starbuck……… Wimbledon high street 又有好多舖頭，仲有間 Theater 添。 平時揸車你只會望住馬路，去邊都係靠導航，而家跑步你係可以慢慢睇清楚周邊，你會對呢個地方加深印象。
好，下次等我又再跑去另一個 town 發掘下先。
