香港雖然已經推出好多年垃圾分類，但係每次經過啲垃圾分類箱嘅時候，都係發覺啲膠樽、鋁罐都好污糟。有時甚至乎你會見到啲人根本當垃圾筒咁用，隨手拋啲垃圾入去，搞到啲回收箱都變得好污糟。
其實喺香港嘅時候我哋已經做緊垃圾分類，癈紙、鋁罐、膠樽等都會獨立用膠袋分類好，當然有洗乾淨啦，然後就會拎去回收箱。不過有次經過垃圾站，見到啲清潔工人都唔會理回收箱裡面嘅嘢係乜，佢哋都拎晒出嚟丟晒去垃圾車。吓！？ 咁即係我哋屋企做咗嘅分類咪即係白做。 點呀，又想為環保出一分力，但係周邊配套又配合唔到，咁點搞？ 好彩之後發現有個社區組織叫綠在區區，佢哋每區都會有回收站，大家可以將啲回收用品拎去佢哋度，既可以回收，又可以儲分換禮品。 起碼我會知道佢哋真係會將啲回收用品分類後再拎去循環再用/處理先。 大家如果都想為環保，為地球先生出一分力，可以去佢哋網站查詢自己嗰區嘅回收站。
網址: https://www.wastereduction.gov.hk/tc/community/crn_outlets.htm#recyc_stations
好多人話嚟到英國其中一個唔太習慣就係要做垃圾分類，因為佢哋喺香港都無乜點做，乜都丟晒去垃圾筒，跟手拎去門口放低就每晚有人清理。而家變得要做分類，覺得好麻煩。 相反我哋又無呢個問題，反正香港時候已經做開，而家只係要再做多一步，就係要分類埋廚餘。 香港做好分類就拎去樓下或者附近嘅回收箱，但係英國就唔係，通常住排屋 / House 嘅都會擁有兩大兩小嘅回收箱 ( 好似係自己同 Council 買 )，每個星期會有垃圾車嚟你屋企收垃圾，記住呀，一個星期先收一次，亦唔係每個星期收晒所有垃圾。 好似我呢區咁，一個星期收廚餘 & 廢紙，一個星期就收廚餘、铝罐癈膠 & 普通垃圾 ( 即係分辨唔到係唔係屬於以上三種回收物嘅就會當晒係普通垃圾 )。 仲有一類比較特別，你係要自己拎去大型超級市場回收，呢啲都係膠嚟，但係就唔可以循環處理，通常呢啲就係用嚟裝麵包嘅膠袋，食物盒嘅封口膠紙……
清潔工人當然唔會入去你間屋幫你倒垃圾啦。大家係要乖乖咁定時定候推自己個垃圾筒去屋前，等清潔工人幫你倒垃圾。 如果你過咗時或者唔記得拎出去，咁樣就 sorry 啦，你要隔多一個星期先有人再嚟收垃圾啦。
其實初時我都有個困擾，剛剛新搬嚟，買咗好多新傢私，全部都係紙箱，發泡膠，咁我一個垃圾筒邊夠裝，咁咪要分好多個星期先可以清理得晒？ 其實呢度都有啲大型回收場，你可以上網預約，然後一車就車晒啲紙皮，癈膠去回收場。 不過回收場會有限制，就係一年只可以登記 12 次，所以最好儲埋一次過拎去。 另外，如果你屋企裝修，當然會有好多沙石要處理，如果拎去回收場，佢哋係會收返你處理費用㗎。 都係嗰句，區區都有唔同，我呢區未必同你嗰區一樣，所以最好去政府網站 check 下就最穩陣。
嚟咗呢度幾個月，對比返香港，呢度用嘅膠真係多好多好多。呢度差唔多所有肉類食材都係用膠盒裝住，飲品又係膠盒，連生果都係用膠盒裝住，所以兩星期先清一次癈膠真係好大鑊，每次都一大箱，仲要多到要另外用一個 “大” 垃圾袋裝住啲膠盒。好彩我呢區嘅清潔工人好好，只要你放出嚟門口，佢哋都會收。 我朋友喺另一區，佢話佢哋一定要用蓋冚好，清潔工人先會倒垃圾，如果你個蓋係冚唔實，佢哋就唔會倒你嘅垃圾，所以每區都有唔同情況，大家最好到時留意返自己嗰區究竟係點做啦！
封面圖片取材自 caaa.wales
