話說上次睇完美女與野獸之後，Mimi 心思思話想去睇 My Fair Lady，不過就畀我 ban 咗。 原因都主要係呢套大人劇，小朋友未必啱睇，而且票價又貴。 如果真係要去睇，就只係佢同蘇菲去睇就算，我同妹梅留返喺屋企睇電視。 上次睇美女與野獸，每張票都成 £65，差唔多 HK$2600，真係一個高消費活動。 就係咁樣就 ban 咗唔去睇。
但係 8 月尾原來英國有個 musical week，好多 musical 都減價，我作為一個好老公，當然上網睇下有乜筍嘢啦。 一睇，原價 £65 嘅飛變成 £40，如果再坐高啲，£20 都有呀。 問下老婆睇唔睇先。 其實都唔駛問，佢實話睇，揀咗 8 月 26 日 7:00pm 睇，盛惠 £160。
今次無咁傻仔提早出去倫敦，等到下午三點左右出發，去到倫敦行咗陣白金漢宮，打下咭，然後快手快腳去咗 Shake Shack 食個晚餐就入場。 估唔到大家都咁準時，我哋雖然早五分鐘，但係大部分人已經入咗場坐定定，環顧四周，全部都係大人，全院滿座。
英國人呢方面好準時，7:00pm 開場，全院黑咗，全場靜晒。 今次係去咗 London Coliseum 睇，劇院比較舊，音響不過不失。 今次座位比較偏左，所以睇起上嚟無咁好。 上次睇美女與野獸都可以聽到五成，話晒畀小朋友睇嘛。 但係今次真係畀大人睇，演員講嘢好快，而且好多俚語，根本聽唔到，又聽唔明。 而蘇哈兩小妹都應該聽唔明，聽到佢哋成日問 Mimi 佢哋講乜，做乜。 你知無論睇戲好，睇演唱會好，最煩就係聽到啲其他聲音喺隔離依依哦哦，咁樣就當然會覺得好討厭啦。 前面嗰行咁啱就係有 2 個睇得好投人嘅姨姨，當妹梅不停咁問 mimi 嘢嘅時候，佢哋就會擰轉頭用一個好厭惡嘅眼神望住 Mimi。 成個上半場佢哋都擰咗好多次，不過 Mimi 好似唔覺得有嘢咁喎。 不過唔止兩小妹聽唔明，我都聽唔明，係 99% 聽唔明呀，人哋笑嘅時候我都唔識笑。 由於上半場我真係好集中去聽同睇，唔知係咪太用力關係，中段時開始眼瞓，仲時不時合埋眼，好彩最後都無瞓著。 中場休息時間，我就同蘇哈兩小妹講，要問嘢等散場時先再問，解釋咗個原因畀佢哋知，希望佢哋明白啦！ 繼續努力睇埋下半場，仍然係聽唔明。
My Fair Lady 劇情我估大家都知道，我睇演員喺舞台上好用心嘅表演，完全感受到佢哋嘅想表達嘅嘢，但係對白內容就真係完完全全唔掂。 睇嚟下次呢啲大人歌劇就唔太適宜帶小朋友同我去睇，留返 Mimi 搵朋友去睇就算，又或者等我英文進步咗之後先去睇啦。 今次同上次有乜分別，今次明顯演員嘅內心戲多咗好多，對演員嘅要求亦高好多，佢哋聲音嘅感染力亦強好多。 可惜我真係聽唔明，所以真係投入唔到。 下次再睇嘅話，都係搵返啲小朋友劇同埋等有特價先睇，票價實在太貴啦！
Be First to Comment