Skip to content

英國詐騙電話

全世界都有騙子,唔一定只有中國有,香港都有,嚟到英國你都會遇到,所以外國月亮唔係一定圓嘅。

今次我遇到第二次詐騙電話。 第一次係啲詐騙電話錄音,一聽就係嗰啲乜嘢速遞包裹被扣留,叫我按 1 字轉駁去畀海關。 長期喺香港經過訓練,對呢類電話已經麻木到會自己作出反應,就係收線。 估唔到嚟到英國都收到呢啲咁嘅電話。 不過之後我又真係有啲擔心,因為咁啱真係上星期我有速遞嘢過嚟香港,呢個電話會唔會係堅嘅呢? 諗心一層,件貨真係有事,佢應該會再打畀我嘅,都收咗線,唔理啦! 一星期後我順利收到件貨,證明咗嗰個係詐騙電話嚟…

第二次詐騙電話就係銀行打嚟話我有筆數出現問題,問我有無碌過一筆 £32 左右嘅數? 當時一聽就下意識覺得呢個電話無問題。 點解我會咁諗? 事緣呢個電話之前大約兩星期左右,我收到過 HSBC Card Center 打嚟嘅電話,原因一樣係有筆古怪嘅數目要求扣數,所以 Card Center 打嚟問我係咪而家碌緊咭,當然我話無啦,咁佢就即時幫我停咗張咭,然後再補返張新咭畀我。 期間佢當然有問啲個人資料,生日日期,姓名咁啦。

今次呢個詐騙電話打嚟嘅時候我沖緊涼,老婆幫我接咗,叫佢轉頭再打嚟,估唔到佢真係半個鐘後再打嚟喎。 一打嚟就話自己係 Frauds team,話我有筆數有可疑,問我係咪有碌過,當時真係無懷疑過呢個係咪詐騙電話。 今次打嚟嗰個人嘅英文真係好難聽,成日都叫佢講多次。 起初佢一嚟就問我姓名,話要核對返資料先,又問我地址。 不過佢啲英文同我嘅英文都真係九唔搭八,我就話不如你畀個 case number 我,我之後再打畀佢哋搵第二個同事跟啦。 佢又用咗唔同理由推搪或者唔理我嘅要求,繼續 keep 住話要我啲資料。 講多咗陣佢又話不如咁,你同我 online chat,不過你要去網上銀行過一筆數先,咁我哋就可以核實到你資料,就可以同你 online chat。 咁樣佢講一講,我就即刻知道呢個一定唔係 HSBC 打嚟嘅電話,而係詐騙電話。 最後我當然話我聽唔明佢講乜,叫佢等等,佢又話你聽唔明不如搵你老婆嚟講,當然我話好,你等等,然後 mute 咗電話,等到佢自己覺得事敗就收咗線。

其實詐騙電話就遇過兩次,詐騙 SMS 就收到幾個,都係話啲 parcel 有問題,叫我 click 條link 去 check 下乜事。 呢啲一睇條 link 就知道唔係好嘢,所以實唔會 click 啦! 最新詐騙 SMS 係話英國有津貼能源,叫你 click 去網站 apply。 呢啲詐騙行為真係會隨住時間而有所唔同,所以大家要提高警覺。

大家無論去到邊度都要打醒十二分精神,一涉及金錢就要多加留意。

另外畀啲 tips 你哋,大部分一接聽就係電話錄音,要求你按 1 / 2 呢啲,九成都會係詐騙電話居多,可以即時收線。

認真望下條 link 就會覺得有古怪,千祈唔好click,唔好貪少便宜
Published in英倫生活談天說地

Be First to Comment

Leave a Reply

This site uses Akismet to reduce spam. Learn how your comment data is processed.