Skip to content

搵工

嚟到英國話咁快就半年有多,即係代表香港份工好快就到期要講拜拜。 將來想喺本地買樓,如果要做按揭,就要有份本地工,銀行先會借錢畀我。 加埋香港儲落嘅錢根本唔夠我哋一家人退休用,仲有兩隻化骨龍讀緊書,唔返工真係唔掂。

近日睇見 Roymail 請臨時工,主要工作係做信件分類。 外國人好重視聖誕節,大家會互相郵寄信件,聖誕咭或者禮物,所以郵局為咗應付呢個爆發式增長信件嘅季節,佢哋會請大量嘅臨時工嚟做分類信件。 我見佢有三個時段提供畀人,Early – 朝早 6:00 到下午 2:00;Late – 下午 2:00 到晚上 10:00;Night – 晚上10:00 到朝早 6:00。 我見 Late 呢個時段唔錯,我可以返咗香港工半日,食埋晏先再踩單車返工都得,夜晚返到嚟休息下,第二朝仲可以車兩小妹返學添。 加埋當做儲下本地工作經驗,可以同人溝通下,人工都有成 £13.5 一個鐘,唔錯呀。

做乜唔搵返 IT 工? 其實我又唔係一定要搵返 IT 工嘅,呢啲又唔多駛用腦,只係用下體力,眼力,腳力嘅工作,應該都唔會太辛苦,做下先囉。 而且我知道自己乜嘢料啦,我又無 degree,又無 MS certificate,英文又唔係好,剩低有嘅係有香港工作經驗,鬼佬都未必會理你,加埋 IT 又係要不停咁追新技術、新知識,真係會學到人到癲。 哈哈哈,其實就係我怕讀書,怕考試,所以先唔想做返 IT 啫。

好,上網申請先,一講到要 apply 工作,我呢啲文件白痴人真係低能到一個點。 我上網申請,一早準備好晒啲 passport、車牌等等嘅資料,話咁快就填好晒 submit 咗出去。 但係兩日後就收到 Roymail 嘅 email 話我遞交嘅資料有錯,初時以為佢直接 reject 我啦! (HR 心諗:呢條友做嘢都咁唔小心,分分鐘請咗佢嚟做嘢咪麻煩多多) 原來佢話會 withdraw 咗我份申請表,叫我自己再去申請過咁話,仲叫我睇清楚究竟我要畀啲乜嘢資料。 人哋寫明要 submit share code 去證明我可以喺英國呢度工作,我又唔知發乜神經 attach 咗我申請 BNO VISA 嘅 email 畀人 ( 裡面有寫我可以喺英國工作 )。

第二日拿拿臨去網上申請返個 share code,然後再填多次張網上表格 send 過去畀 Royalmail。 相隔兩日,又再次收到 Royalmail email,話我今次個 share code 無 upload 去正確地方,叫我喺佢哋個 uCheck 裡面正確位置再 upload 一次。 頂,究竟邊度呀…. 又要再嚟多次。 其實我搵極都搵唔到究竟邊度 upload share code,都唔知今次再 submit 係咪會 ok,希望今次 ok 啦。

隔咗兩日又再收到 email 話我 submit 上去嘅文件有錯,個 share code 文件要 upload 去返相應嘅地方,叫我再 apply。 我今次逐個 field 去睇,都睇唔到究竟邊度有寫明 share code upload,都係求其再搵另一個地方再試下。 今次究竟係會再彈回頭定係唔會再受我玩呢?

等咗成三個星期,音訊全無。 我有無填錯呢? 我有無 send 錯 copy 呢? 佢又無彈回頭,咁係咪叫做無問題呢? 但係無問題又點解會無晒聲氣嘅呢? 心有不甘,去 Royal Mail 網站睇下招聘頁面 search 下有無我 apply 嗰份工先。 Loading…… Loading…… Watching…… Watching…… 點解唔見我嗰區有空缺嘅? 唉,應該係我改咗咁多次,已經搵咗其他人去做啦。 第一次就咁衰咗!

23-Nov 終於收到 Royal Mail 嘅email,原來真係太多人申請,所以暫時無位畀我。 佢哋會睇下情況,如果有位會再通知我返工…… 即係我已經 submit 成功啦。 而家都就嚟 12月,應該都唔會有工返㗎啦,叠埋心水下年一月搵工。

Published in談天說地

Be First to Comment

Leave a Reply

This site uses Akismet to reduce spam. Learn how your comment data is processed.