Skip to content

Black Friday

往時 Black Friday 喺香港都會出手買下嘢,今年我又投資咗去邊度呢?

今年終於喺英國體驗一下 Black Friday 嘅威力。 以前好記得真係要等到嗰日先會有特價,但係而家都唔會囉,通常都係會提前成個星期就開始,大家叫呢個做 Black Friday Week。 Black Friday 類似大陸淘寶嘅雙 11,就係所有嘢都會大特價,係超級大特價。 你信唔信? 你試過雙 11 淘寶就會知,唔係一定著數,外國商家同大陸商家都係一樣,都係會抬高個價,然後又話有超級優惠,其實都係原來平時嘅價錢。 有啲就會標返原價,但係加送啲贈品或其他嘢畀你,等你感覺優惠咗。 當然有啲商品真係會做優惠啦。 我當然會做一個精明嘅消費者啦 — 格價,之前一早 mark 低心儀產品嘅價錢,一到 Black Friday 就可以睇下同之前嘅價錢有乜分別。

1. Asus Vivobook 14 Notebook (£599) — 第 12 代 Intel CPU,16GB Memory,512GB SSD,14″ OLED Display。老婆一直投訴用開部 notebook 神神哋,又話會自動彈個 windows menu 出嚟,mouse 又會彈跳,又話慢。 見今次 Asus 呢部機 spec 真係唔錯, 價錢同平時香港差唔多,咁就買嚟換咗佢部機,等佢返工做嘢都開心啲,咁就唔會再煩我要幫佢整機。

2. VAX Compact Power Plus Carpet Cleaner (£99) — 考慮咗好耐,究竟係去租洗地毯機定自己買,最後朋友話一台機都係百幾鎊,做乜去租,而家見有特價就買咗返嚟。 保持屋企清潔係有需要,因為班細嘅真係成日碌喺地下。

3. Google Nest Doorbell (Battery) (£114.99) — 屋企近馬路邊,周不時都有人掉啲嘢入嚟花園,上次有人放咗個手袋入嚟,就係因為無 cam,睇唔到邊個放。 加埋最近 youtube 見到有人拍到送速遞後被人入屋打劫,所以覺得有需要裝返個 cam 喺門口,感覺會安全啲。 呢隻用電池,大約可以用到 6-8 個星期,無電就拎返入屋再叉。 本身想買有線款,但係間屋唔係我,又要鑽牆,又要駁電線,費事搞到業主間屋,呢款簡單易用。

本身想買電視,但係睇中嗰款 Sony OLED TV 又無做太大優惠,仍然覺得好貴,遲啲先買。 本身又想買套 HIFI 返屋企聽下歌,但係個減幅又係唔太多,唔急就唔買住,繼續用住 cheap cheap Google Speakers 聽歌先。 其實有好多嘢想買,可惜無錢,就算有又覺得好似唔係一定要買,因為呢度啲價錢真係貴。 今年感覺同往時唔同,而家主要買嘢係睇實唔實用,係咪有需要。 真係要想清楚先好買,買咗返嚟先覺得無用就無謂。 雖然呢度好多嘢都可以 return and refund,但係咁搞一搞都浪費時間啦。

Published in娛樂購物

Be First to Comment

Leave a Reply

This site uses Akismet to reduce spam. Learn how your comment data is processed.