Skip to content

淘寶集運到英國

係呀,係淘寶呀,唔係英國嘅淘寶呀。 做乜嚟到英國仲要返大陸淘寶? 唉,我都唔想,要戒甩淘寶呢樣嘢真係好難。 講嚟講去都係淘寶夠平,英國有 VAT 20% 真係乜都貴人一倍有多。 加上淘寶真係好勁,你諗到嘅嘢,你無法子喺呢邊買到嘅產品,淘寶都可以幫你搵到出嚟,你話勁唔勁先?

事緣都戒咗淘寶差唔多一年有多,嚟到英國已經盡量去 ebay,amazon 度買。 但係總喺有啲嘢你搵唔到。 好似買拖鞋,人字拖,呢度真係無乜地方有,去 ebay 搵,原來最後搵到嘅都係由大陸 ship 過嚟,要等成個幾星期,價錢又貴。 有日無聊走去開個 AliExpress 睇下,搵下有無啲車嘅補品,雖然係有,但係又貴又要等成個幾月先可以運到嚟。 把心一橫開個淘寶睇下,一 search 之下,百幾個產品出嚟,價錢真係平到你笑。 再搵埋其他嘢,又係百幾二百樣嘢彈晒出嚟畀你,最後加加埋埋原來都 add 咗成 26 件貨入購物車。

再去 ebay 搵下有無相似嘅嘢,有嘅,不過個價錢真係相差好遠喎。 我買一個手提燒焊機,呢邊同一款最平搵到都要成 £99,但係淘寶只係 HK$450;亞女本身用開支 3D 筆嘅材料,ebay 要成 £15.99,淘寶只要 HK$75;拖鞋,頭先講一對質素差到無論嘅人字拖,ebay 賣成 £5.44,淘寶我買對靚嘅全膠拖鞋都係呢個價。 其實仲有好多嘢喺 ebay 搵唔到,搵到代替品嘅話,加埋加埋咁樣去 ebay 買嘅話,真係多多錢都唔夠用。 最最最令我不滿嘅就係,大部分我搵嘅嘢,好多都係直接大陸寄出。 如果係咁嘅話,點解我唔用淘寶買,唔通真係要等我下次返香港先去淘寶買?

諗咗幾個星期,忍唔住上網搵下會唔會有集運到英國,原來真係有㗎,啲人仲要寄嘢食過嚟英國添。 睇咗幾個網站,都係咁上下,自己走去淘寶 search 下會唔會有先。 原來都真係有好多集運公司送嚟英國,我揀咗間都叫多人留評語嘅一間試下。 大概流程都係同普通香港集運一樣,將啲貨速遞去佢哋個倉,然後你打開佢哋 wechat 小程式,新增你所有件嘅速遞號碼同貨品內容,等全部嘢入晒倉,你就可以一次過 ship 過嚟英國,當然你要畀運費啦。

不過我估近呢兩三年去淘寶都會好煩,因為經常不停封城封區,萬一你嘅集運倉就正正位處疫區,咁你就唔可以將啲貨 send 去呢個集運倉。 點解我咁講? 因為我今次瀨咗嘢囉。 明明早幾日嗰幾件都可以送到去集運倉,突然今日見有 message 話速遞件已經退回,走去問淘寶店,佢話因為個倉咁啱被封鎖咗,又唔知幾時會解封,所以件速遞件就退回咗,仲問我有無其他地方可以寄去。 我拿拿臨又走去問集運倉嘅 CS 啦,佢哋答係呀, 早兩日封咗區,叫我可以轉去另一個集運倉,佢哋會安排返之前已經收咗貨嘅 group 返埋一齊,叫我放心,完全有晒應對方案。 不過我就比較煩啲,要逐個同淘寶賣家講,麻煩佢哋將啲件轉去另一個倉。 好彩啲賣家都明白,個個都話會幫手改,有啲直頭話會寄過另一件去新倉,唔等退件返嚟,都真係唔話得。 咁樣擾擾攘攘,都搞多咗成半個月先到齊晒集運倉。 跟手就係合箱過嚟英國,26樣嘢,運費要 HK$700,係比較貴,但係都總比喺英國買平。

大家可能會問,咁樣集運嚟英國,海關唔駛收稅咩? 正常嚟講應該要,收幾多我都唔知,不過唔試過又點會知呢? 如果太貴,咁之後咪唔淘囉。 如果海關無收,嘻嘻……… 我賺咗!

22-Nov 集運發貨

13-Dec 終於到咗英國 Royal Mail 倉

19-Dec 郵差叔叔送郵包嚟,可惜我聽唔到門鐘響,佢又再送返去總部

20-Dec 去咗總部拎郵包,唔駛收稅,賺咗

雖然要成個月先到,但總算叫做淘到,而且價錢又平。 一年都可以淘一次。

用 wechat 去落單集運,到晒倉之後就可以集運過嚟
第二日就去拎,唔駛畀稅,yeah
經歷一個月時間,紿終收到晒,啲嘢無穿無爛
Published in娛樂購物

Be First to Comment

Leave a Reply

This site uses Akismet to reduce spam. Learn how your comment data is processed.