Skip to content

生病了

今年英國冬天特別凍,我已經住喺南部,照理唔會凍得太離譜。 但你真係估唔到,今個冬天居然係會凍得咁誇張。 Scotland 最凍去到零下 17 度,我呢邊都去到零下 3 度。 而且落雪都落得勁大。 小朋友就好開心,走出去感受一下雪,不過始終係南部,都未可以好似中部或者北部咁砌雪人,就算砌到都係細細一個。

不過唔知乜嘢事,唔知係咪我哋真係咁黑仔,第一年就遇到好多英國未曾發生嘅事。 好似頭先講嘅冬天好鬼凍啦,而今年嘅夏天又係零舍熱,聽返啲波友或者業主講,真係過去十幾年都未試過咁。 過到嚟又特別多病,唔係我,係屋企人啫。 係咪未習慣呢度環境,抵抗力差咗咁多嘅? 定係呢度嘅菌勁啲?

一到埗無幾耐就中咗武肺病咗啦,蘇哈佢哋間唔時又會病幾日,差唔多每兩個月總會病下。 11月左右 蘇菲病咗兩三日,原本以為小問題。 點知呢頭蘇菲病好,跟住妹梅就病咗,仲要病咗差唔多 7 日咁耐,又 keep 住發高燒、流鼻涕、嘔、眼屎仲要濕又多,搞到黐實晒雙眼,佢又不停咁捽,搞到對眼又紅又腫,食極藥都係唔退燒,鼻塞又瞓得唔好,成日話好辛苦,真係擔心死人。 想同佢睇 GP,但記得上次睇時,醫生都係話未夠 5 日睇嚟都無用,今次一到第 5 日就打去約,點知打極都唔通,唯有繼續食藥。 第 6 日妹梅就感覺好返啲, 第 7 日就生龍活虎。 以為事情告一段落,點知又到返蘇菲病,今次仲要加埋同 Mimi 一齊病。 呢隻病毒真係勁,一病就係發高燒、頭痛,搞到兩個完全喪失活動能力。 細嘅病咗無問題,Mimi 仲可以煮飯,但係而家 Mimi 都病埋,邊個煮飯呀? 成個星期就係靠我煮麪、煲粥,或者食外賣。 一早起身就送妹梅返學,返嚟屋企就開工開會,中午又要煮麪畀兩個病人, 下午夠鐘又要去接妹梅返嚟,跟住又要煮粥或者出去買外賣,定時定候餵食藥,加埋洗碗洗衫,真係做到人都癲。又係足足 5 – 6 日左右,佢哋終於無事,回復正常,謝天謝地,thanks god!

就喺佢哋病緊中途,英國衛生局就話今年隻 Strep.A 病毒好勁,叫市民小心啲,一有唔妥就要去搵醫生,仲話有小朋友因為呢隻病毒而死咗。 如果呢篇文章我一早睇到,我諗妹梅病到死死下嘅時候,我應該會第一時間同佢去醫院排急症。 嗰時真係以為只係普通傷風感冒,原來有隻咁嘅 Strep.A,睇落佢哋 3 個真係似係中咗呢款。

安靜咗3 個星期,大家都期待聖誕嘅來臨,原本已經安排好晒節目,18 號搞咗個聖誕 party,點知前一日蘇菲又無預警咁發高燒,唯有取消 party。 係度慶幸緊今次只係一個中嘅時候,點知 Mimi 又唔舒服,天呀!! 莫非又要繼續上次嘅非人生活? 唔好玩我啦!

咦? 點解咁耐都係講嗰 3 個病嘅,你無事咩!? 嘻嘻! 蠢人唔會病㗎嘛! 講笑啫,我又點會無病過,不過通常都係 1 – 2 日左右就好返,係咁灌自己飲水,飲 Lemsip 就 ok。 頭先話妹梅病得好勁嗰次,我都有畀佢傳染到㗎,不過咁啱又撞正要去打波,我就飲咗 Lemsip 就出咗去打咗場波,第二日喺屋企抖下,跟住就無事啦。 可能真係去咗打波,出咗身汗,迫咗啲病毒出嚟。

不過最後我想講,一人父母帶住小朋友嚟英國,真心奉勸唔好,父母最好一齊嚟,真係其中一個跪低咗,仲有一個可以照顧小朋友。 又或者真係搵一個落腳點係有相熟朋友可以互相照應,如果唔係萬一有乜事,真係盞搞到自己又兼嚇死小朋友。

話時話,唔係人先會病,機器都會因為太凍而 out of function 㗎。 英國呢邊用 Boiler 提供熱水同畀 Radiator 發熱用,但係16 號朝早妹梅話點解開咗咁耐熱水都唔熱嘅,走上去閣樓睇一睇,頂,做乜出咗 error 燈,拿拿臨叫老婆搵業主問下乜嘢事。 業主又真係好好人,返緊工都特登走過嚟幫手睇下乜事,原來係因為太凍, boiler 條去水喉外面嗰段凍到結咗冰,但係外面嗰段咁長,邊段結冰無人知,上網睇好多人都話用熱水淋下條喉咁就得,但係業主都話怕會爆喉,所以佢諗咗個方法,就係去水喉接駁室外嗰段先斷開,用水桶兜住排出嚟嘅水,我就要間唔中上去望下個桶滿唔滿,滿就倒咗啲水再嚟過。 唉,好啦,用住咁嘅土法先啦。 要等到天氣無咁凍,啲冰自己溶咗通返,我就可以駁返條喉去室外。 之前已經發生過個 boiler 由於氣壓太低而罷工,而家又因為太凍而罷工,真係吹到啤一聲。 唔知 boiler 仲可以會有乜嘢奇怪事會發生, 一年內可以遇到嘅都遇過晒,希望唔會再有大問題啦!

Published inHome Sweet Home英倫生活

Be First to Comment

Leave a Reply

This site uses Akismet to reduce spam. Learn how your comment data is processed.