去到碼頭, 只不過係 9:45pm, 見到新渡輪排o左好長龍, 我o地唯有跟住排啦. 排o左十五分鐘先入到入境處櫃位, 係呢 part 都叫順順利利, 就o係登船入閘一刻, 唔知點解好混亂, 有旅客大鬧職員, 又有人打尖, 到我o地去攞位時, 發覺我o地同教練一家失散o左!!! 搵極等候區都搵佢o地唔到, 所以斷定佢o地一家應該係已經上o左船. 佢o地就好準時咁上o左 10:30pm o既船返香港, 而我o地就等到十一點先上到船, 足足遲o左半個鐘, 黑仔到爆~~
上到船後, 又發生o左一件令人氣憤o既事. 上o左船, 唔知點解亞 Ken 會被安排分開坐. 咁亞 Ken 就問職員點解, 呢個低級職員就搵o左另一位高級職員過o黎. 就o係高級職員同低級職員了解情況時, 開口就話, 呢張係 10:30pm o既票喎, 乜乜物物, 意思係指, 呢隻係 11:00pm o既船, 你 10:30pm o既票, 而家有位比你, 你仲嘈, 好似話緊我o地唔o岩. 算, 亞 Ken 叫佢安排過, 個職員就話, 等開船, 有位比你, 你喜歡坐邊咪坐邊囉, 態度極之惡劣. 講下講下, 亞 Ken 話要投訴, 叫佢俾個名, 點知佢就答, 你抄低我個名囉, 個名係度, 你抄囉… 嘩~~~ 態度極之囂張.
最後船長出o黎了解情況, 其實講o既o野同樣大約話開o左船, 有位的話會安排你坐係你朋友附近. 但係態度同表達手法係令人滿意. 最後當然亞 Ken 可以同 William 坐埋一齊啦.
唔好以為故事完o左呀, 重有下文. 當到達香港, Victo, Sol & Amy 先落下層, 我o地五個人就等緊人比投訴 form. 就係我o地落到下層時, 聽到有人大喊,
高級職員: 打吖, 打吖,
我(心諗): 發生乜o野事呢? (事後知道: 原來 amy 話要打比鄭裕彤投訴, 佢聽到時, 就係咁狂叫~~)
跟住又再聽到個高級職員同 Sol 嘈緊交.
Sol: 你呢o的乜o野態度呀?
我(又係心諗): 做乜事搞到 Sol 都咁火爆呢?
原來之前個高級職員係下層講是講非, 話我o地唔o岩, 咁 sol 同 victo 就同佢講….
Sol & Victo: 我朋友係上面等緊你比個名佢喎 (同高級職員講)! 點知~~
高級職員: 我忙吖嘛, 我一忙就唔記得o架啦.
就係咁, Sol 就同佢嘈起上o黎! 初時我o地都拉 Sol 走, 唔好理呢o的咁o既人, 點知突然間回頭見到 Jacky 同佢又嘈過!
高級職員: 你o地唔係要我個名咩, 唔好走吖, 我而家比你. 唔好走~~~
Jacky: 比呀, 我而家企係度等你, 你比我!
咁我o地又再拉佢走, 行行吓, 我原本都一句聲都無出過, 都懶得出, 點知佢係度繼續大聲講,
高級職員: 我無位比你, 態度梗係咁o架啦!
嘩, 即時無名火起, 我o地一行咁多人起勢咁同佢嘈, 問佢知唔知道乜o野叫態度! 我o地唔係為o左編位出錯而鬧, 而係佢o既態度問題, 佢又再重申, 係咁o架啦, 無位比你, 態度梗係咁o架啦…. 跟住係岸邊o既工作人員拉我o地走時同我o地講.
工作人員(淡淡然): 算啦, 算啦, 佢辭o左職o架啦, 唔好同佢嘈啦.
最後係副船長o既一聲令下, 叫佢關門, 然後架船以極速駛離港口, 而我o地就結束o左呢一場罵戰了.
估唔到, 成日o既旅程, 就係咁精彩o既節目下結束o左!!