睇完比賽已經係下午三點, 當然第一時間係去醫下肚先啦! 本來我o地諗住去氹仔食大利豬扒飽, 點知大排長龍, 等唔切之下, 我o地轉而目標去新陶陶食翅, 但係可惜, 原來佢只係做午市, 之後要等到五點半先開門做生意, 係極度肚餓之下, 我o地唯有去o左誠昌飯店, 等o左 15 – 20 分鐘, 終於有位, 分別叫o左水蟹粥, 鯪魚球, 炒花甲, 椒鹽鮮魷同埋炒o左一碟菜, 唔知係咪出o左名, 早幾年去食時都覺得好好味, 而家反而變得普普通通!
大家買完手信, 食飽之後, 我o地見都已經 4:15pm, 見又無乜地方想去, 就諗住坐車入去黑沙公園附近o個間葡國餐廳 book 位食晚飯, 加埋o個度有個露天休憩處可以坐低大家飲杯o野, 慢慢等位, 所以就決定搭車入去! 其實好好彩, 去到巴士站, 見到有架 25 號, 但見太多人, 費事迫, 所以就話等下一班, 點知就係咁出事啦, 等o左足足大半個鐘, 企到嘔都仲未見有第二班車. 其實我o地有兩架車係可以去到目的地, 分別係 25 號同埋 26A 巴士, so far 咁耐只係見過一架 25 號, 而傳說中o既 26A 巴士就係差唔多 45min 之後終於見到, 但係飛站, 終於等到五點半, 架架車都滿座, 我頂唔住啦, 打o左電話比個 Macau friend, 睇下佢方唔方便車我o地, 好彩, 個 friend 剛剛係澳門, 所以我o地就唔駛再等巴士, 入到去黑沙公園時已經係夜晚六點啦, 用o左成個半鐘先入到黑沙公園, 激死!!
本來都諗住咁早, 今次應該唔駛等咁耐就可以食, 點知當我去寫低資料時, 發現已經要等二十幾張枱, 當然我o地無咁易放棄啦, 就坐係休憩處, order o左渣 SANGRIA, 邊飲邊等, 仲邊打啤牌, 等到成七點半, 知道仲要等多三張大枱之後先到我o地, 唯有好無奈咁放棄, 搭車出返新馬路附近一帶搵o野食. 就係咁, 我o地就隨意入o左間中菜館, 點o左幾道小菜, 大家都因為好肚餓, 食o左都唔夠一個鐘, 就將十幾碟小菜全部清晒, 仲飲o左成打幾啤酒, 食飽之後就出發到碼頭.
圖片取材自 www.nba.com