Skip to content

NBA 中國賽 2007 – 睇波篇

NBA 中國賽 2007 – 睇波篇

起初無諗過會去澳門睇 NBA 中國賽, 由於Macau friend send o左封 email 比我, 話可以訂飛, 睇下我有無興趣.  點知當我問其他朋友有無興趣時, 個個都話 ok, 咁就組成o左一行十二人o既澳門 NBA 中國賽睇波團.

20 號當日, 我o地乘搭 8:30am o既新渡輪過澳門.  咁大個仔, 都係第一次坐豪華位, 估唔到原來係有免費早餐同埋報紙供應.  過到去就轉乘威尼斯人o既免費專車. 大家係度講笑, 會唔會個網站係假o既, 會拎唔到飛, 所以落車後, 第一時間去票務處度, 當然最後係成功咁拎到飛啦… 

未入場前, 我o地係威尼斯人入面o既 shopping mall 行o左一陣, 其實都係一o的名牌店, 我o地都只係睇下, 消磨一下時間, 等到十二點, 我o地就入場睇波啦!!  初時以為係場館會有o的 NBA 中國賽o既紀念品賣, 點知入到去, 只有一個攤檔有得賣衫, 來來去去只係賣下波衫, 衛衣, 帽, 都無乜特別o野吸引到我有呢個購買慾, 失望.

係未比賽前, 其實已經有o的啦啦隊表演, 又有 hip hop, 又有雜技表演, 完全唔會令你感覺沉悶.  整場比賽最吸引我o地o既並唔係場球賽, 反而係周圍發生o既事.  唔知係咪因為係季前賽, 雙方都唔係表現咁落力, 無駛出真功夫, 只有第三節先有o的較勁o既氣氛.  所以搞到我o地反而比場邊發生o既o野吸引住.

成個賽事, 我o地覺得騎士隊o既吉祥物真係表現得好好.  無論o係乜o野時間, 佢都會係場邊搞氣氛, 令到場球賽生色不少.  好似係電視機面前睇球員射罰球時, 籃板後面o既人會舉高o的吹氣棒棒係咁搖, 希望可以干擾個球員, 等佢射唔入, 原來係鏡頭外面, 實情係呢隻吉祥物, 係咁做動作示意觀眾做出呢種舉動.  當個球員射入o左, 佢會發脾氣, 紮紮跳, 好似話比你聽佢唔開心; 但當射唔入, 佢又會好開心咁, 敲鑼敲鼓.  好搞笑.  

記憶中有一幕, 佢係度派禮物比山頂o既觀眾時, 佢唔小心將份禮物撞到自己, 攪到射唔到份禮物比觀眾, 佢就去走去用腳踩份禮物, 好似話緊份禮物唔聽話, 乞人憎咁, 好搞笑!  其實仲有好多趣事, 講都講唔晒, 真係要入場睇先可以感受得到!

Published in行街街

Be First to Comment

Leave a Reply