Skip to content

秋季晚宴

公司本來諗住搞過秋季活動, 等班員工可以輕鬆下!  原本計劃去西貢定係去貝澳 BBQ 或者係去打 War Game, 點知做過民意調查, 無人有興趣!!  所以最後大家都揀o左去盛八食日式燒烤, 咪又係 BBQ, 只係換o左形式.  

終於係十二月二號晚上七點, 我o地一行二十人o黎到盛八.  由於一早 book o左檯, 所以店方安排o左個比較好o既位置比我o地!  而店裡面o既環境唔錯, 大家都坐得好舒服.

入到去盛八, 坐定之後, 順手拎本餐牌o黎睇, 點知比我發現到o的o野, 就係餐牌的第一頁, 會有個「盛八小教室」,教你烤肉秘訣, 點樣保留食物o既原汁原味, 其實咪即教你點燒先至係最好?

講下氣氛先, 呢間o野都算唔錯!  店員o既招呼好好, 周不時過o黎斟茶, 斢酒, 又有親切o既笑容, 又會推介店中o既撚手小菜比你!  大家如果怕嘈的話, 店裡面有一房間, 大家坐係塌塌米度, 一邊食o野一邊傾計, 唔錯!

講完氣氛, 當然要講下食物質素啦.  日式燒烤, 鹽燒牛舌, 岩鹽和牛都好好, 羊鞍都唔錯….  而我最欣賞o既食物係拉麵, 石鍋泡菜牛肋骨麵, 海鮮湯麵, 真係正!!  當然啦, 佢o地仲有好多食物, 全部都好新鮮, 好好味!!

最後當然係講下價錢啦!  一個字, 貴!!  平均每人消費都要成四佰蚊左右!  當然如果只係兩個人來吃拉麵和飯, 落樓都係百零蚊, 都係叫抵食o既!  如果要燒烤的話, 就差不多要每人三四佰蚊了!!  可能由於佢o地賣點係新鮮, 所以每碟o既份量都唔係太多, 所以真係要慢慢細味, 千祈唔好 “嗗” 一聲就吞o左去啦!!

店名 : 盛八日式燒肉店
地址 : 銅鑼灣怡和街2-6號英光大廈3樓
電話 : 3106-0183 

Published in公司

Be First to Comment

Leave a Reply