Skip to content

撞車驚魂記

今日係平安夜o既前夕, 又係星期六, 雖然要開工, 不過都好開心, 因為諗到一放工就可以去玩, 重要有一連三日o既假期, 真係想快o的收工!  點知……….  大家睇到個標題都知道係乜o野事!  攪到而家乜o野心情都無晒.  

咁多年, 都未試過咁大獲, 以前最多咪撞下泵巴, 尾板, 而且係自己撞欄, 撞電燈柱o者.  唉……  估唔到今次居然係撞車, 重要係撞人 pat pat.  無論係邊個角度o黎睇, 都係自己唔o岩!

撞車經過: 
今朝一早去停車場拎車, 由於昨晚係個客度工作到零晨點幾先返屋企, 今朝又要早起身返工, 諗住揸車返工, 夜晚就揸車接 Victo 機.  拎車時 Victo 亞媽已經問, 你隻眼好紅喎, 睇唔睇到o野, 揸唔揸到車, 我話無問題, 點知去到落荃灣o個段斜位時, 有一個客打o黎, 平時我都會拎起手機聽, 今日由於一早插o左 handfree, 咁就拎起 handfree 接電話, 就係聽緊電話o個一殺那, 我就撞o左落前面架車度….


泊o左架車埋一邊後, 我問對方有無受傷, 然後就商討賠償問題, 點知對方點都要拎架車返原廠維修, 咁我唯有報警, claim 保險.  因為原廠維修一定好貴, 負擔唔起, 加埋架 Corona 都唔係新車, 睇落都成九年十年車,  無理由比佢o既, 所以最後等警方到場.  而家等十日內對方打o黎要求賠償幾多, 如果真係傾唔掂, 就要上法庭, claim 保險.  好煩!!  

希望對方:
而家只係希望佢唔好要求咁多, 因為上庭o既話, 警方已經會話我跟車太貼, 起碼扣五分, 然後罰款 $2000, 跟住保險我最少都要自墊 $5000 – $6000.  加埋都要 $8000, 所以對方唔係要求太過份, 我諗我都會賠比佢, 費事煩!

自己架車:
唉, 揸住架車去搵亞哥o既相熟車房, 師傅睇完, 打過電話之後, 起碼要成2萬, 嘩, 個心即刻涼o左一半, 係因為成份隻糧就咁無晒, 仲要貼多多…..  同亞哥商量完之後, 又再揸架車去第二間車房, 今次師傅話最少要萬三四, 但係唔需要2萬咁多,  而且佢話你唔好再揸架車啦, 隨時會跪低o架, 因為架車o既鬼面罩, 車頭蓋, 泵巴, 水箱, 風扇, 冷氣o既隔塵網, 全部都要換, 而家睇表面係咁, 如果拆o左架車睇過之後, 隨時會有更多要換, 好似冷氣喉, 唔知會唔會有事咁!  但係估計都唔駛2萬咁多o既……

感想:
而家諗返, 都好彩自己同對方都無事, 如果真係引致他人受傷, 自己都唔好過!!
重有, 揸車最好就係唔好聽電話, 因為真係會影響人o既判斷力!  精神唔好同樣唔好揸車啦!!  各位有車o既朋友, 小心!!  一路平安! 

對方私家車 – Toyota Corona
Toyota Echo

Published in關於我的....

Be First to Comment

Leave a Reply