聖誕 party, 唔知大家今年有無參加呢? 又參加過幾多個呢? 今年我就有兩個, 一個係同o的左鄰右里, 另一個係同班朋友一齊慶祝聖誕. 話明係聖誕 party, 當然少不免禮物呢家o野啦, 由於今年有兩個 party 要參加, 所以要買兩份禮物! 大家都知, 諗買乜o野禮物好煩o架嘛. 加埋今年有個主題, 就係要實用, 所以都幾難諗.
今年o既聖誕都算幾凍, 似返一個聖誕! 今年o既燈飾比往年靚, 唔知係咪真係經濟好o左, 係街度見到o的人都覺得o的人比較投入去 enjoy 呢個聖誕, 點解咁講? 因為係街度見到好多人戴晒聖誕帽, 個個都開開心心, 所以感覺今年o既聖誕氣氛好過舊年!
講返 party 先, 第一日o既 party 好早就開始, 一點左右已經齊集係鄰居o既屋企, 我o地玩o左好多遊戲, 好似 – 有口難言, 芭蕉樹同埋交換禮物. 當然最好笑係交換禮物, 何解? 其實我o地並唔係隨便交換禮物就算, 係要經過重重波折先可以拎到自己o既禮物o架! 其中一個好笑o既要求係Carlos 要走落樓, 搵三個人講 Merry X’mas 先可以上o黎拎禮物! 搞掂! 當日全日都好開心, 完全將我之前撞車o既唔開心, 一掃而空! 而整個 party 都係一片愉快聲中結束! 不過當日都有一個小插曲, 就係之前我咪撞車o既, 當晚突然間收到荃灣差館打o黎o既電話, 叫我而家過去, 話有人報警, 投訴我撞佢架車, 要求賠償, 雖然我係度參加緊 party, 但都要放低晒o的o野去差館! 就係呢件事搞到我半夜十二點, 事後仲要比我知道, 原來當晚我可以拒絕亞sir 唔去差館, 再揀另一日去o架! 激氣!
第二日o既 party 就係去 Bobo 屋企 BBQ, 今次真係拎住支义, 拮住o的o野食o黎燒燒燒. 正! 提議, 下次可以燒下蜆類食品, 唔錯o架! o個日仲見識到 Bobo 點整荷葉飯添….
今年o既聖誕禮物分別抽到 卡片盒 同埋 花灑頭. 兩個都好實用!! 嘻嘻!
有興趣o既朋友, 可以去回憶集度睇下當日o既花絮!