2006 年 12 月 31 日, 亦即係 2006 年最後一日, 咦, 話咁快又過o左一年. 禽晚公司係中環o既一間叫做 Oyster Station o既餐廳舉辦o左一個倒數晚會. 活動預計係晚上九點半開始, 但係估唔到, o的人會遲到, 搞到成十點左右先到齊人, 下次約班友仔都係要通知早半個鐘到先得!
唔知大家有無去過呢間餐廳, 淨係聽個名, 大家都會知道間o野係食乜, 咪就係 – 蠔 囉! 係咪覺得好奇怪呢? 有乜咁奇, 識我o既人一定會知. 就係我從來都唔食蠔, 咁我點算呀, 乜都無得食. 而係事前亦問過係咪只係食蠔, 飲下酒, 吹下水, 等迎接 2007 年o既來臨, 所以我同 Victo o係去 Oyster Station 之前就走o左去銅鑼灣食o左個煲仔飯. 食到飽晒先過去! 精呢!!
殊不知當我去到o既時候, 見到有羊鞍, 牛仔骨之類o既物體, 天呀! 有無搞錯呀, 早講呀嘛, 咁就唔食飯o黎啦! 後來發覺差不多所有同事都食o左飯先o黎, 大家一致裁定 Albert 要負上全部責任.
既然有美食當前, 當然飽都要食啦, 唔好執輸, 個個都起勢咁食, 食食下, 突然o黎o左個海鮮拼盆, 有日本蠔, 有魚生, 有帶子, 有蝦, 有象拔蚌, 嘩, 真係好好味. 諗住唔食蠔, 但係身邊o既 Eric 不停咁叫我 Try 下, 咁我就將隻日本蠔放落口入面, 嘩~~~~ yumi, yumi, 好食喎, 同平時o個o的唔同o既…
跟住就係主菜: 蠔, 有唔同種類o既蠔, 而服務生亦都好有耐性, 好詳細咁介紹比我o地知道o的蠔o既品種, 食邊隻先, 應該食o的淡味o的o既蠔先, 然後就慢慢食o的重味少少o既, 連我呢個平時都唔食蠔o既人, 都食o左起碼 7-8 隻咁多, 真係諗起都想再食呀!!
而全晚最高興o既時刻, 梗係大家一齊倒數, 迎接 2007 年啦! 想感受一下當晚o既氣氛, 就 click 入去回憶集度睇睇啦
係度希望新一年, 有新開始, 好運接踵而來!
大家如果有興趣, 可以去試下! 正!
名稱: Oyster Station
地址: 中環必列者士街31號
電話: 2549 0132