Skip to content

澳加搬遷

終於完成o左澳加搬遷o既 project, 可以再埋首去另一單 project. 澳加呢間公司係我公司o既第二個客, 我o地service o左佢都成 8 到 9 年啦, 佢o地同我o地一路成長, 當然佢o地好成功啦, 可以做到而家計埋大陸, 有成 240 人之多.   由初初 7 個人做到而家, 見住佢由細單位搬到大單位, 而家仲有埋自己物業做寫字樓, 佔地成萬幾呎, 真係開心!

佢o地差唔多每兩至三年都會搬一次, 而每次搬都會好麻煩, 大家唔好睇少搬寫字樓好似好簡單, 只係需要安排運輸, 執拾文件之類, 係背後, 其實有好多o野要注意, 只係電腦方面, 我已經要留意以下o既事情.  

1/ 電話位, 電腦線位o既位置安排
2/ 電話線, DDI 線搬遷問題
3/ PBX (電話機) 安裝問題
4/ Broandband o既搬遷安排
5/ 中港專線o既搬遷安排
6/ 視像會議系統o既安裝, 設計
7/ 整個 Network Infrustructure o既規劃, 以符合未來五年o既要求
8/ 開源節流 (呢個係管理層覺得最重要o既一部份)
9/ 跟進裝修進度, 避免位置錯誤, 安裝錯誤
10/ 當日搬遷o既過程細節

隨便都可以列出咁多點!  因為係當中, 涉及o既細節問題係好多, 一唔小心就會瀨o野.  呢個 project 係兩個月前開始籌備, 每星期開會報告進度.  終於係上個星期六日完成o左.  頓時真係心情開朗o左好多.   

係度真係要多謝一班同事o既努力, 星期六日要開工, 仲要開到半夜三更, 而且毫無怨言, 真係唔話得.  呢個 project 亦多得同事 Russell, 佢負責o左好多o野, 佢雖然之前無經驗, 但係做得非常好. (雖然佢係過程中有低潮期, 症狀: 喊, 忟憎, 鬱悶, 但都擔得起.)  相信經過今次, 佢學到好多o野, 下次第二間公司又要搬, 相信佢會輕易而舉咁做得晒所有o野. 嘻嘻!!  

係澳加喬遷之日, 公司都送o左一盆蘭花過去恭賀!  好靚o架!  係度唔該晒公司o既女同事去揀o左盆咁靚o既蘭花去做賀禮.  無失公司面子 (因為盆花放o左係入口位置!)…   Thank you!

圖片取材自 www.wellgroup.com.hk

Published in公司

Be First to Comment

Leave a Reply