Skip to content

Sol ~ 引刀逞一快, 日後多暢快

Sol ~ 入院做手術
日期: 七月四日 ( 吉日 )
宜: 動手術

經我查過通勝, 七月四日呢日係全年最適宜動手術o既日子, 所以 Sol 揀o左今日做手術.  (你條友仔咪係度吹水喎!!) 係呀, 我係吹水呀, 吹咩….  

總之今日佢做手術, 而手術都順利咁完成. 雖然佢只係瞓一晚醫院, 第二日出院,  但係我o地晚上都去o左探佢, 以示我o地關心佢!  (Sol: 好感動呀!) 呵呵呵~~  唔駛感動, 朋友嘛!!

講o左咁耐, 都唔記得講 Sol 今次為乜要做手術添…  佢因為之前打波受傷, 令到前十字帶斷o左, 而半月板又移位, 所以經過半年求診之後, 終於要做手術了!!

今日去到o既時候, 私家醫院即係私家醫院, 每個床位都有獨立電視, 仲有 headphone, 避免你影響其他人, 洗手間又大又寬敞, 最重要係乾淨.  唔知點解, 去親o的公立醫院, 都會有好大陣醫院味, 但係養和又唔多覺喎!  奇!  入到去見到 Sol, 佢即刻面露笑容, 應該都好開心見到我o地真係o黎探佢.  

去到之後, 亞 Ken 就教 Sol 點用拐杖, 教完一輪, 就叫 Sol 係床位度行出去走廊, 練習一下!  行o左大約十五分鐘左右啦, 係回床位途中, Sol 突然間想嘔, 就咁直奔入洗手間, 嘔完一輪, 佢連講o野o既力都無, 仲要滿頭大汗咁攤係張床度.  諗返其實都幾殘忍, 今日先剛剛做完手術, 晚上就要行咁多路.  都好辛苦!! 

當然我o地呢班友仔去到, 又點會剩係得咁少o野發生吖!  係成個探病過程中, 我o地幫 Sol 製造o左好多機會去同護士妹妹溝通溝通一下, 希望佢可以把握機會啦!  我o地又整o左一個愛心飯盒比佢, 唔知佢食得滿唔滿足呢?

今日呢一刀, 就令 Sol 要再見 07 籃球, 希望佢係 08 早日再會籃球啦!!  努力o的做物理治療, 早o的好番呀!!  重振昔日籃球場上o既英姿. 

各位要睇佢入院情況?  去回憶集度睇下啦!!

圖片取材自 health.udn.com

Published in朋友

Be First to Comment

Leave a Reply