Skip to content

暑假遊 – Southampton & Bristol

今年終於可以去旅行啦! Sir,你又話嚟英國就係旅行嘅? 係喎,咁呢個 trip 就係暑假 local 遊,唔係旅行囉。 兩個細嘅放暑假,點都要搵啲節目做下嘅,繼上次去咗睇歌劇之後,今次就係安排佢哋出遊,去Southampton (修咸頓) 嘅 Paultons Park 樂園玩。

Paultons Park 裡面有幾個園區,分別有 Peppa Pig World、Lost Kingdom、Little Africa、 Tornado Springs、Critter Creek。 上官網見到佢有個 package,兩日一夜包酒店同兩日入場券,好似幾抵。 山長水遠揸兩個鐘車,無理由只係去兩日一夜就返屋企,係咪留多一兩日參觀下修咸頓呢? 繼續上網睇下修咸頓有乜玩先,值唔值得留多兩日。 搵下搵下,又見到原來 Bristol (碧仙桃) 暑假有個熱氣球節喎,不如夾啱時間過埋去睇,橫掂 Bristol 同修咸頓都係相隔個零兩個鐘頭車程啫。 好,一於咁話,頭三日修咸頓,再玩多兩日 Bristol。

決定好就去做下啲資料搜集先。 樂園嘅 package 究竟抵唔抵呢? 係咪真係要分兩日玩? 定一日其實已經可以玩得晒? 修咸頓又有乜嘢玩? 有乜嘢好食? Bristol 個熱氣球節又點玩法? 根據網上資料,大部分人要用兩日玩 Paultons Park,以我哋一家人嘅行動力,大家都明白我哋更加要兩日啦! 咁官網嘅 package 又真係幾抵喎,家庭票 ( 2 大 2 小 ) 一日已經要 £155,兩日加埋就已經要 £310,而家只係需要 £320,即係畀多 £10 就有酒店。 加上我揀呢間酒店有成 500 年歷史,連著名小說 ( 傲慢與偏見) 嘅作家 Jane Austen 都入住過,點都唔會差得去邊啦! 何況之前都未住過呢啲咁歷史悠久嘅酒店,通常都係住啲新式酒店,試下囉。 我就係喺咁樣嘅諗法之下就 book 咗 4 日3 夜,盛惠 £609 ( 謎之聲音:傻仔 )。 好,搞掂修咸頓,搞埋 Bristol 先。 Bristol 只係諗住去 Bristol International Balloon Fiesta,所以只係 book 咗一晚酒店。 喺 Expedia,Agoda 搵到間叫做 Future Inn 嘅酒店,有免費泊車,只係 20 分鐘車程就可以由熱氣球場地返到酒店,睇相間酒店又幾企理乾淨,評語都唔差。 走去用埋 HSBC 咭畀錢仲有 16% 優惠,扣埋之前 expedia 嘅積分,一晚只係 HK$980 左右,抵啦,就係咁樣又 book 咗呢間 (謎之聲音:正確選擇 )。

係時候計劃一下行程,頭 2 日去 Paultons Park,上官網搵咗地圖睇,應該第一日就去 Peppa Pig World 園區玩下先,然後玩埋附近兩個園區應該差唔多一日。 Mark 低埋園區啲 shows 嘅時段;第二日就去 Lost Kingdom 同附近園區,應該又可以用一日時間。 第三日主要喺市內參觀,搵咗幾個景點,慢慢行,慢慢睇。 反而今次要 plan 嘅係午餐同晚餐,好傷腦筋,不停係 google map 放大修咸頓睇下有乜食肆餐廳。 唔知大家有無發覺,外國食客普遍留低嘅食評都係 good,我已經試過中幾次招,啲嘢食普通都唔普通,但啲人又話好食,delicious,畀晒 5 粒星星。 但係自己真係唔知邊度有好嘢食,唯有繼續參考 google map 嘅食評。 第四日去 Bristol 嘅行程又係相對簡單好多,熱氣球場地有不同 food shops,所以根本唔需要諗,去到見到有乜想食就食囉。 行程就係全日坐喺草地觀賞熱氣球同埋其他表演。 第四日就一早去睇多次熱氣球,中午就去同當地朋友食餐晏,聚一聚,然後就返屋企。

呢次暑假遊嘅行程編排好似好順利,好快手就搞掂,同以往去台灣,日本時比較,真係輕鬆好多。 可能之前嘅旅行我比較貪心,好多地方想去,好多嘢想做,就一次過 pack 晒落嗰七日旅程,有時都搞到好似好急,所以次次都唔可能跟到行程表去做。 今次應該得啦卦。

Published in周遊列國

Be First to Comment

Leave a Reply

This site uses Akismet to reduce spam. Learn how your comment data is processed.